GIAWHAG ni Konsehal Jerry Guardo, chairman sa committee on infrastructure, ang Department of Engineering and Public Works (DEPW) sa paghimo og dinaliang lakang aron di mabutang sa peligro ang kinabuhi sa mga residente nga nagpuyo sa walo ka mga balay sa barangay Budlaan, bukiran sa dakbayan sa Sugbo.
Si Guardo nagkanayon nga mopalabang siya og resolution atol sa regular session sunod semana aron sa pormal nga paghangyo sa DEPW nga mohimo og program of works and estimates (Powe) alang sa pagbutang og riprap aron mapugngan ang padayon nga pagdahili sa yuta gumikan sa baha.
Ang maong lugar gibisita na ni Bise Mayor Edgardo Labella human nipadala og suwat sa iyang buhatan si Kapitan Neressa Antolihao gumikan sa iyang kabalaka sa mga residente kinsa nagpuyo sa relocation site nga gihatag sa City Government.
Si Labella niawhag usab ngadto Cebu City Local Disaster Risk Reduction and Management Office (CCLDRRMO) sa paghimo og pagkisusi sa lugar ug paghimo og rekomendasyon aron mahatagan og dinalian nga aksyon sa City Government.
Si Nagiel Bañacia, pangulo sa CCLDRRMO, nibutyag nga niadtong Hulyo, nakahimo na og assessment ang iyang buhatan ug ila nang nakita ang sitwasyon sa maong lugar.
Iyang gibutyag nga subli silang mopadala og personnel aron sa pagsuhid og usab sa dapit.
Matod ni Labella nga di angay huwaton nga aduna pay dautang mahitabo sa propiyedad o kinabuhi sa mga nagpuyo inay mohimo dayon og aksyon aron mapugngan ang pagtumaw sa katalagman.