KATAW-ANAN kining mga kagawad sa Sannguniang Bayan (SB) sa Panglao, Bohol. Tiaw bay ang “Executive Assistant on Transportation” sa opisina ni Mayor Nila Montero mao ang nagpadala og imbitasyon sa usa ka PUJ operator nga patambungon sa sesyon sa SB kaniadtong Lunes, Disyembre 12, 2016.
* * *
Lisod sabton ang suwat ni Danilo Reyes, Executive Assistant on Transportation sa opisina ni Mayor Nila Montero. Mao kini ang unod sa iyang suwat, pinitsahan og Disyembre 5, 2016. “The Office of the Municipal Mayor alarm the reports on road incidents involving your driver and conductor to the crews of Southern Star bus company.” Unya mipadayon si Reyes sa pag-ingon: “In connection to this concern the Sangguniang Bayan of Panglao is inviting you for a session regarding the safety of our riding public…” Unsa man sab ang aksyon sa talahurong Mayor? Gi-aprob niya ang suwat pinaagi sa pagpirma niini.
* * *
Tulo ka sayop ang akong nakita. Una, sayop ang suwat kay wa magkadimao ang grammar niini ug lisod sabton kini. Ikaduha, lahi ang trabaho sa Panglao SB ug sa trabaho sa opisina sa Mayor ug way labot ang Mayor sa kalihokan sa SB, ilabi na ang pagpadagan sa sesyon. Ikatulo, lisod sabton nga ang sakop sa Mayor maoy moimbitar sa pagtambong alang sa sesyon sa Panglao SB.
* * *
Sa dihang nag-sesyon na sila, nahibaw-an nga way franchise ang Southern Star Bus Company alang sa rota nga Tagbilaran-Panglao-Tagbilaran. Matod pa sa ilang tigpamaba, duna silay pending nga application sa LTFRB sa Cebu. Giangkon usab niini nga ang ilang franchise sa lalawigan sa Bohol maoy ilang gihimong rason nga mobiyahe sila sa rota nga Tagbilaran-Panglao-Tagbilaran. Apan bisan pa niini, makita ang pagpabor sa pipila ka mga SB kagawad sa gustong mahitabo sa Southern Star Bus Company – nga undangon ang matod pa, pagpang-harass sa mga driver ug conductor sa mga driver ug conductor sa Southern Star. Gipakita sa Southern Star ang usa ka video recording sa mga panghitabo diin gibabagan sa mga PUJ operators sa Panglao ang pipila ka mga bus sa Southern Star.
* * *
Usa lang ang gustong mahitabo sa mga PUJ operators sa Panglao. Gusto nila nga mokuha usa og franchise ang Southern Star sa di pa sila mobiyahe sa maong rota kay sila nga taga-Panglao, duna may franchise sa maong rota. Kay nasayod man sila nga way franchise ang Southern Star, mao kini rason nga ilang gibabagan ang pagbiyahe sa Southern Star.