Diputado: Dunay rason nga masuko si Presidente Rody Duterte kang Ombudsman Conchita Carpio-Morales

PINASIKAD sa reklamo ni Senador Antonio Trillanes, gusto ni Ombudsman Morales nga ukayon ang mga kabtangan ni Duterte apil ang mga sakop sa iyang pamilya pinaagi sa gideklarar niini sa iyang Statement of Assets, Liabilities and Net Worth (SALN).

Matod ni Duterte, nganong unahon man pag-ukay ni Morales ang reklamo ni Trillanes batok kaniya nga duna pa may daghang mga kaso nga nauna pa unta sa pag-file apan hangtod karon wa pa matandog.

Selective justice kini, matod pa ni Duterte.

u25cf ● ●

Tungod niini, nagtuo si Duterte nga gigamit lang si Morales sa mga kanhi opisyal sa pangagamhanan ni PNoy.

Gawas pa niini, nasuko sab si Duterte nga peke ug dili tinuod ang mga papeles nga gamiton sa Ombudsman sa pag-imbestigar kaniya.

Matod pa sa Anti-Money Laundering Council (AMLC) wala sila mopagawas og mohatag og mga dokumento ngadto sa Ombudsman sa bank accounts ni Duterte og mga sakop sa iyang pamilya.

Kon mao kini, diin man diay gikan ang mga papeles nga gibasehan ni Trillanes sa iyang reklamo batok kang Duterte nga mao usab gihapon nga mga papeles nga giwara-wara karon ni Overall Deputy Ombudsman Arthur Carandang nga maoy basehan sa iyang pag-utingkay sa mga kabtangan sa presidente og sakop sa iyang banay?

u25cf ● ●

Mao kini dakong katingad-an.

Dinhi sa Pilipinas, dili basta-basta mogawas ang mga bank records sa usa ka depositor sa bangko tungod kay protektado kini sa Bank Secrecy Law (RA 1405).

Daghan og mga gikinahanglan buhaton aron mogawas kini, apil na ang pag-sang-at og kiha ngadto sa AMLC.

Apan dakong katingad-an kay nakakuha si Trillanes og mga bank records ni Duterte nga matod pa nagpakita kuno sa mga kwestiyonable ug kadudahan nga mga transaksiyones sa pamilya Duterte.

Kinsa may naghatag ni Trillanes sa mga papeles?

Tinuod ba kaha ang maong mga papeles?

Kon dili kini gikan sa AMLC, nagpasabot ba nga gikan kini mismo sa mga bangko ng gidepositohan ni Duterte?

Wala ba kaha makalapas sa Bank Secrecy Law (RA 1405) ang maong mga bangko kon ilang gipagawas ang mga bank records nga walay pagtugot sa tag-iya?

Magamit ba nga ebidensiya batok kang Duterte ang maong mga bank records kon nakalapas sa balaod ang pagpagawas niini?

Mao kini ang mga pangutana nga angayan tubagon bahin sa maong kaso.

u25cf ● ●

No chance.

Mao kini ang gidangatan karon ni Overall Deputy Ombudsman Carandang.

Kon mo-retire si Ombudsman Morales, way bisan gamay nga tsansa nga itudlo siya ni Duterte nga mopuli kang Morales.

Mao kini ang problema sa anaa sa gobierno.

Dili mahimo nga dili niya tumanon ang mando ni Ombudsman Morales mao nga mapugos gyod si Carandang sa pag-imbestigar kang Duterte.

Apan tungod sa iyang pagtuman sa mando ni Morales, mahimo sab niyang kontra si Duterte kay mapugos man siya pagpangita sa mga ebidensiya batok kang Duterte.

Gawas pa kini sa gisulti ni Duterte nga nag-gamit si Carandang og “fabricated evidence” batok kaniya.

Natural nga masuko gyod si Duterte kang Carandang.

Ang problema kay si Duterte ang motudlo sa mopuli kang Morales kon mo-retire na kini.

Mao nay giingon nga sama ra sa naglana og potot sa lubi si Carandang sa iyang gihimo karon.

u25cf ● ●

Kinsa may mo-imbestigar sa Ombudsman kon dunay moreklamo batok kaniya, susama sa selective justice nga pasangil sa presidente batok kaniya?

Ubos sa balaod, ang Ombudsman usa ka opisyal nga matangtang lang pinaagi sa impeachment.

Apan ang impeachment kutob lang sa pagtangtang.

Duna bay gitahasan sa balaod nga mo-imbestigar sa Ombudsman aron pagsuta kon nakalapas kini sa balaod sama sa ubang mga opisyales sa gobierno, pasakaan og kaso unya presohon kon mahukman nga sad-an?

Dunay gitawag og Internal Affairs Board ang opisina sa Ombudsman nga maoy gitahasan sa pag-imbestigar sa mga kahiwian sa mga opisyales og mga sakop sa opisina sa Ombudsman.

Nagpasabot ba kini nga bugtong ang Internal Affairs Board lang ang adunay katungod pag-imbestigar kang Morales kon dunay moreklamo og kahiwian sa panarbaho?

u25cf ● ●

Padayon karon nga gihisgotan ang mahitungod sa pag-oktaba sa barangay elections.

Gusto sa presidente nga bungkagon ang kasamtangan nga mga namunoan sa barangay tungod sa ilang pagka-lambigit sa ginadili nga druga.

Kon buhaton ang piniliay sa barangay karon, hayan makabalik lang sila sa paglingkod sa ilang posisyon sanglit magamit man nila ang ilang abot gikan sa negosyo sa druga.

Mao kini rason nga gusto sa presidente nga i-oktaba ang piniliay unya magtudlo og mga OIC nga maoy modumala sa barangay hangtod maghulat sa piniliay sa Mayo sa sunod tuig.

Kon dili kini buhaton sa presidente, lisod nga tangtangon ang mga namunoan nga dunay kalambigitan sa druga.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph