Drawing sa mga nawong sa killers ni Alegre naa na

MIPAGAWAS na og manual nga cartographic sketch o drawing sa nawong ang kapu­lisan sa dakbayan sa Mandaue sa posibleng dagway sa mga suspek nga mi-ambush patay ni manlalaban Amelie Alegre didto sa Brgy. Looc sa dakbayan sa miaging semana.

Duha ka sketch pa lang ang gipagawas sa Mandaue City Police Office (MCPO) tu­ngod kay mao pa kini ang ilang nakuha base sa nakita sa CCTV footage ug pagsaysay sa mga nakasaksi sa pamay-ong sa mga suspetsado.

Ang sketch, matod pa, mihulagway sa gunman ug sa drayber nga gisakyan sa gunman nga mipaduol ug mipusil sa sakyanan ni Alegre niadtong Huwebes sa gabii.

Si PSSupt. Mariano Natuel Jr., hepe sa MCPO, nagdumili pa paghatag og dugang detalye kabahin sa ilang sketch.

Giawhag karon ni Natuel sa publiko nga tabangan ang kapulisan aron masuta kung hain magtago-tago ang mga suspetsado sa insidente.

Gihatag usab niya ang landline sa MCPO nga 344-6314 ug  email niini nga mcpopcr@yahoo.com kon ugaling aduna kamoy importanteng im­pormasyon aron mahayagan ang maong kaso.

Base sa mga nakasaksi, nga ang du­ha ka mga suspek nga makita sa sketch nagpaniinid nang daan sa law firm sa abogada sud sa duha ka semana.

Matod ni Natuel nga dako ang puruhan nga ang nagsige og paniid sa abogada sa gitrabahuan mao usab ang gunman tungod kay mas nakaila man kini sa target. Nasuta ning mantalaan nga unom ka mga suspek ang nalambigit sa pag­pamanhig sa abogada nga miangol sa kaubang manlalaban niini nga si kanhi Mandaue City Administrator Briccio Boholst ug kawani niini nga si Antonio Pino.

Sa pagkakaron, upat na ka anggulo ang gitan-aw sa kapulisan apan nagdumili pa sa paghatag ug dugang detalye si Natuel mahitu­ngod niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph