MAKADAWAT ang mga kawani sa dakbayan sa Talisay og dugang bonus gawas sa P5,000 nga ilang madawat nga Performance Enhancement Incentives (PEI).
Si Mayor Eduardo Gullas maoy mipasalig niini apan nagdumili ang mayor sa pagbutyag kon pila kini.
Kini wa pay labot sa 13th ug 14th month nga bonus nga nadawat na sa mga kawani ug ang P10,000 nga ilang nadawat sa dihang nilingkod si Gullas sa katungdanan niadtong Hunyo.
Si Talisay City Treasurer Emma Macuto miingon nga ang tanang 300 ka mga regular nga kawani sa city hall makadawat og tag P5,000 sa di pa ang Pasko isip maoy PEI.
“Ang 13th month nahatag na pag May 15 unya ang 14th month kay last Novemeber 15, ang kaning PEI supposedly ihatag December unya naa man tay available funds ani kay apil man ni sa 2016 budget,” matod ni Macuto.
Midugang siya nga ang dakbayan nigahin og P2,000,000 alang sa pagpanghatag sa PEI.
Apan ang mga job order employee nga kapin sa 900 ka buok aduna gihapoy madawat nga ilang gitawag og differential sanglit nagdawat man sila karon og P300 matag adlaw ug ang P50 nga differential maoy ilang ipanghatag.
Si Engr. Ariel Araw-araw, presidente sa Talisay City Hall Employees Union, miingon nga tungod sa pagkamanggiluy-on sa mayor dako ang iyang pagtuo nga gawas sa P5,000 aduna pa unyay dugang niini.