USA sa mga init nga gihisgutan karon sa social media ang #LeniLeaks nga giingon nga nagtinguha nga palagputon si Pangulong Rodrigo Duterte sa pwesto.
Kini atong nasayran pinaagi sa artikulo sa Thinking Pinoy (TP) nga nagbulgar sa kukabildo (conversations) unsaon nga makakuha og suporta sa Duterte Resign nga panawagan sa Global Filipino Diaspora Council.
Ang artikulo nagbisto sa kukabilo sa mga dumadapig ni Vice President Leni Robredo ug kontra ni President Rodrigo Duterte nga gipaambit sa kapin 52,000 ka higayon sa Facebook.
Sanglit ang usa ka share niini makaabot sa daghan nga mga bumabasa, ang isyu sa #LeniLeaks kusog pa sa bagyo nga mihugpa sa netizens.
Sa akong nabasa, ang Thinking Pinoy naglista sa aktibong partisipante sa kukalbildo sama nila, Billionaire Fil-Am lobbyist Loida Nicolas-Lewis, igsuon ni Nicolas-Lewis Commission on Filipinos Overseas (CFO) chair Imelda Nicolas, CFO Commissioner Jose Molano Jr., Inquirer US Bureau columnist Ted Laguatan, ABS-CBN Europe News Bureau correspondent lawyer Gene Alcantara, ug Northern Europe civil society leader Filomenita Mongaya Hogsholm.
Akong nahinumdoman nga niadtong miaging buwan nabalita nga nanawagan si Nicolas-Lewis kang President Duterte nga moluwat sa katungdanan.
Dihang miguwa ang artikulo sa Thinking Pinoy, daghan ang nagyawyaw nga netizens, nagbatikos kang Vice President Leni Robredo. Nagkadaiyang hait nga pulong ang ilang giluwatan. Kay kung makamatay lang ang ilang pulong, namatay na ang mga tawo nga ilang gibatikos.
Gani, wa sab makalingkawas ang mainstream media sa batikos sa mga netizens kay wa kuno mihatag og bili sa maong isyu, giakusahan ang media nga tua midapig ni Robredo.
Ang Malakanyang pinaagi ni Secretary Martin Andanar nagtinguha nga imbestigahan ang planong palagputon ang Pangulo.
Apan suma ni Albay Representative Edcel Lagman, kung basahon ang kutay sa email nga nag-viral sa social media wa kini nagpadayag sa desinyo nga i-destabilisa ang gobyerno sanglit ang email nagsuyot lamang nga paresaynon ang Pangulo tungod sa takarag (erratic) nga desisyon sa pagpalubong ni kanhi Pangulong Ferdinand Marcos, Sr. sa Libingan ng mga Bayani (LNMB).
Sa akong nakita, tabukunon og pito ka lawod ang kahigayonan nga mapalagpot ang Pangulo tungod kay taas ang pagsalig kaniya sa mga Pilipino.
Gawas niini, super majority ang iyang dumadapig sa Kongreso nga maoy mohikay sa impeachment batok kaniya. Ug labaw sa tanan, way mahitabong kudeta sanglit maayo niyang pagkaatiman ang militar ug kapolisan.
Apan di maayong mokompiyansa ang Pangulo, ilabi na ang iyang mga tawo sa gobyerno, kay wa kita nasayod sa huna-huna sa ubang tawo nga kritikal sa diperensya sa ilang panggobyerno.