SUMA sa uban, ang tam-is nga kalampusan maggikan sa tiunay nga paningkamot.
Kini ang nasinati sa DXDC 621 RMN Davao human nanguna sa tanang mga istasyon sa radyo sa AM band sa Davao Region sa 3rd Quarter 2017 survey nga gihimo sa Kantar Media Survey nga opisyal nga gikomisyon sa Kapisanan ng mga Brodkaster ng Pilipinas (KBP).
Ang survey gihimo aron susihon ang kinaham nga istasyon sa radyo sa mga tigpaminaw nga maghatag kanila og impormasyon ug kalingawan.
Ang kadaugan gisegundahan sa Kantar Survey alang sa 4th Quarter sa miaging tuig nga ang RMN Davao nakalatid sa taas nga istandard sa excellence ug naka-establisar nga mas superyur sa industriya sa radyo.
Ang kadaugan maoy nipamatuod nga mahimo kini pinaagi sa pagtuo sa ilang katakus sa pag-alagad sa mga DavaoweƱos ug Mindanaoans, ang ilang mainiton
nga tinguha ug pasyon nga makigharong sa bag-ong hagit nga dala sa digital media.
Kini maoy nakapahimo sa DXDC 621 RMN Davao, usa sa 65 ka mga radio stations ilawom sa RMN Networks, nga pasidunggan sa pinakataas nga pasidungog sa kompanya: Henry R. Canoy Excellence Award for 2017 for the Primary Area Category nga gipangalan ni anhing Don Henry R. Canoy.
Ang pasidungog gitunol ni Van Omega, RMN Networks Operations Support Group (OSG) head, sa ngalan nila Enrico Guido Canoy, Vice-President for Operations ug Chairman and President Eric Canoy niadtong Biyernes, Pebrero 9, didto sa Jade Dragon Hotel ning siyudad sa Davao.
Si Leobardo Daugdaug, Station Manager, mapasalamaton sa management sa ilang pagsalig sa mga inisyatiba nga gihimo sa numero unong sibyahanan.
Iya sab gipasalamatan ang tanang personahe nga nagpaluyo sa ilang kadaugan.
Mga programa sa RMN Davao mao ang Unang Radyo Unang Balita nga gidumala ni Bernard Pantallon, Straight to the Point ni June Duterte, Serbisyong Straight to the Point ni Misel Miral, Kolokabildo sa Radyo ni Joel Viray ug Kuskos Batikos ni Erin Lumosbog nga gipaluyohan sa tibuok News & Public Affairs Team, Digital Newsroom, ug uban pa.
Gawas niini, gipasalig nila nga ilang panindtuon pa ang mga drama sa radyo ug palambuon ang ilang mga programa alang sa katagbawan sa mga suki nga tigpaminaw.