ANG Eastern Mindanao Command (Eastmincom) wala pa makadawat og “proof of life” sa giingong unom ka mga tawo nga gikidnap sa mga rebeldeng New People's Army (NPA) ning bulana.
Sumala ni Eastmincom spokesperson Ezra Balagtey nga wala pa pa sila nakadawat og “proof of life” sa gipangbihag labi na sa duha ka sundalo nga gikidnap sa NPA sa Sultan Kudarat.
Niadtong Dominggo sa hapon, Pebrero 19, pinaagi sa PTV Facebook page ang Communist Party of the Philippines, pinaagi sa Philippine Revolution Web Central nagpagula sa unom ka mga pangalan sa ilang gipangbihag.
Ang mga nabihag mao sila Private First Class Edwin Salan, nga gidagit sa Alegria, Surigao del Norte niadtong Enero 29, Sergeant Solaiman Calucop ug Private First Class Samuel Garay nga gikidnap sa Columbio, Sultan Kudarat niadtong, Pebrero 2.
Gawas sa mga sundalo nakidnap sab si Police Officer 2 Jerome Natividad didto sa Talakag, Bukidnon niadtong Pebrero 9.
Lakip sa giingong naa sa kamot sa mga rebelde ang duha ka Paramilitary nga sila si Rene Doller ug Carl Mark diin didto gipangdakop sa Lupon, Davao Oriental niadtong Pebrero 14.
“As a positive gesture, the Party calls on all concerned NPA units to expedite the release of the six prisoners of war captured over the past days,” suma sa Communist Party of the Philippines pinaagi sa Philippine Revolution Web Central.
Apan nagtuo ang kasundalohan nga di sila mga prisoners of war kon di biktima sila sa pagpangidnap.
Nanawagan ang kasundalohan sa publiko nga gilayong gipahibalo kanila kung dunay mga presensiya sa mga NPA sa ilang dapit nga dunay gipangdala nga mga bihag.