SA dihang mayor pa si Presidente Rodrigo Duterte sa Davao City, daan na siyang mipadayag sa niaging tuig nga gusto niyang usbon ang Juvenile Justice Law o Republic Act 9344 nga gipangamahanan ni Senador Francis Pangilinan.
Kini human niya maobserbari nga ang mga menor-de-edad gigamit lang sa mga sindikato kay lagi ubos sa RA 9344 nga napasar niadtong 2006 dili man masilutan o dili mabilanggo ang mga nagpangidaron og 15 anyos paubos bisan og kini makahimo og linuog nga mga krimen.
Nalatid usab sa maong balaod nga kadtong mga nagpangidaron og 16 ug 18 anyos nga makahimo og krimen ipaubos sa pag-atiman sa Department of Social Welfare and Development (DSWD).
Tungod niini, mapugos na lang ang mga tinugyanan sa balaod sa pagbuhi niadtong mga makasasala nga menor-de-edad aron paglikay sa kahasol.
Sa samang higayon, nakapa-agni usab kini kanila nga mohimo pa og dugang kasal-anan kay dili man lagi mapriso.
Karon nga na-presidente na si Duterte, duna na karoy balaodnon nga nag-ung-ong nga mag-usab sa RA 9344.
Gikan sa 15-anyos paubsan ngadto sa 9-anyos na lang ang mahimong makalingkawas sa silot.
Mahimong duna kini maayong epekto kon ikomparar sa orihinal nga balaud nga napapasar ni Senador Pangilinan kay lagi di pa man hingkod ang pamuot sa 9-anyos ug dili daling masugo ug mapahimuslan sa mga dautang elemento.
Pero ang wa makita ni Duterte mao nga wa hingpit pagpatuman sa Juvenile Justice Law tungod sa kakulang sa pasilidad nga kabutangan niadtong badlungon nga mga menor-de-edad nga nangasikop.
Kini maoy rason kon nganong ang mga tinugyanan sa balaod mapugos na lang sa pagbuhi sa ilang mga dinakpan nga mga bata.
Ug mao usab kini rason kon nganong midaghan ang mga krimen nga mga binuhatan sa mga menor-de-edad kay di na man sila mahadlok kay lagi dili man usab sila mapriso.