Editoryal: Dinaliang pagsira sa CitiLink

DAGHANG nasurprisa ug nasagmuyo niining kalit nga pagsira sa One Citilink Terminal diha sa N. Bacalso Avenue, dakbayan sa Sugbo sa niaging adlaw.

Kini tungod kay bisan gamay lang nga notisya wa gyuy gihatag ang City Government ngadto sa mga hingtungdan.

Katarungan ni Mayor Michael Rama sa pagpasira niini mao nga ang terminal nag-operate nga way mayor’s business permit ug aduna usab kini utang nga P12,802,782 ngadto sa gobiyerno.

Tungod sa kinalit nga pagsira, moabot ngadto sa 300 ka mga V-hire drivers nga nagbiyahian sa habagatang bahin ug ingon man pipila ka mga tindahan sulod sa maong terminal ang naapektohan niini. Wa pa ni labot sa kahasol nga nasinati sa mga pasahero ilabi na kay adlaw kadto sa tingsakay.

Dili kuwestiyon ang pagpasira sa mayor sa CitiLink Terminal tungod kay lagi napakyas man kini sa paglukat og mayor’s business permit. Apan ang paagi sa pagpasira niini maoy dili makiangayon ngadto sa mga naapektohan.

Nganong ultimo ora man dayon kining giimplementar nga gani wa gyuy pahibawo o anunsyo ngadto sa mga drivers o sa management nga ila kining sirhan nianang adlawa?

Plano man kaha sa dakbayan nga ibalhin ang terminal sa mga V-hires atubangan sa Taboan Public Market nganong wa may gipahigayong dry run aron unta way makalitan sa pagsira ug di usab makamugna og dakong kahasol.

Laing rason, di mo-qualify nga butangan og terminal ang maong dapit kay haduol kini sa hospital sigon sa nalatid sa balaod. Pero por diyos, por santo, basin nalimot ang mayor nga bisan og usa ka haligi wa pa intawoy naugbok alang sa edipisyo sa hospital.

Ambot og nganong gidali-dali ni sa Mayor.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph