Editoryal: Magbantay sa panglawas

GAWAS sa dengue, gibantayan sab karon ang pagkuyanap sa sakit nga leptospirosis, ilabi na gyud nga nagsige na og ulan ug pipila ka lugar dinhi sa dakbayan sa Davao magbaha.

Hinungdan nga ang City Health Office nagpahimangno sa publiko nga magbantay kanunay sa ilang kaugalingon ilabi na kon motaak sa mga bahaon nga lugar sa dakbayan.

Kini nga sakit giingong bakteryal pinaagi sa ihi sa mga hayop, ilabi na gyud sa ilaga.

Makuha kini sa mga tawo nga kanunay motaak og mga tubig baha, ning panahon sa ting-ulan.

Mga sintomas niini mao ang taas nga kalinturrra, pagpanugnaw, pagpanakit sa kaunoran, sakit sa tiyan, ug mga rashes nga makita sa tawo nga duna niini.

Puriso nga gawas sa pagbantay batok sa mga lamok nga nagdala og kagaw sa dengue, mas nindot sab nga magbantay kita niini nga matang sa sakit.

Mas maayo kon mogamit kita og mga bota kon motunob kita og mga baha o kaha pahubson una ang tubig baha una motaak niini.

Ug kon di gyud malikayan nga makataak og baha, mas maayo nga pag-abot sa balay, manghugas og maayo sa atong mga tiil gamit ang sabon.

O kon duna nay mamatikdan nga mga simtomas niini, mas maayo nga mokonsulta og doktor o kaha mobisita sa duol nga mga barangay health center aron nga mahatagan gilayon og alibyo.

Di na kita mohulat nga mograbe pa ang sitwasiyon una pa kita modangop sa mananambal.

Angay nga magbinantayon kita sa atong panglawas ning panahona kay sa giingon na, lisud ang magkasakit.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph