USA ka 20-anyos nga single mother nga giingong nag-operate og online pornography ang nasikop kagahapon sa mga tinugyanan sa balaod nga gipangulon ni Chief Inspector Leo Deofiles sa Regional Anti-Cybercrime Office (Raco)-Central Visayas atol sa gipahigayong raid sa Barangay Dumlog, diha sa Talisay City.
Matod pa nga duha ka mga manghod sa suspek nga nagpangidaron og 16 ug 17 anyos nga mga estudiyante ang naluwas sa kapulisan ug gidala na ngadto sa Department of Social Welface and Development-CV.
Niadtong Martes sa buntag, usa ka Meliza Ogaob, 38-anyos, ang nasikop usab tungod sa susamang salaod.
Naluwas ang tulo ka mga babaye nga nagpangidaron og 17 ug 19 anyos ug laing upat ka mga lalaki nga nag-edad usab og 10, 6 ug 5.
Tungod niini si Cordova Mayor Mary Therese Sitoy-Cho nagplano nga mopalabang og ordinance nga maghatag og ganti nga labing minus P20,000 ngadto sa makatug-an kon kinsa sa ilang silingan nga nag-operate og cyber pornography.
Nindot ug mahimong epektibo kaayo kining maong lakang kon mahinayon kay natural mangahadlok na man unya ang mga dautang elemento nga mopasiugda niini.
Pero, samtang atong gihangop kining laraw sa mayor, wa kini magpasabot nga sa kinatibuk-an hingpit kini nga mawagtang.
Ang tendency niini mao nga posibling ang mga operator mobalhin na usab kini ngadto sa laing lungsod ilabi niadtong mga lungsod nga walay igong kuwarta nga ikaganti sa mga mosumbong.
So, kon anaa na ni sa Talisay, dako kaayo ang posibilidad nga nikatap na usab kini sa ubang lungsod.
Sa laktod nga pagkasulti, dili kay ordinance lang ang gikinahanglan niini kon dili usa gyud ka national law aron maapil usab sa pagprotehir ang mga pobring lungsod.