Editoryal: Serbisyo ug pasidungog

DILI matukib ang among kalipay ug pagmaya human maangkon ang mga sukli ug bugti sa serbisyo sa pag-alagad ngadto sa publiko.

Kini mao ang paghatod sa mga malab-as nga panghitabo ug balita sa palibot ug pagdunol sa mga kasayuran nga may labot ang lungsod ngadto sa atong mga suki ug batid nga tigbasahan sa matag karon ug unya.

Niadtong Dominggo sa gabii, walo sa 12 ka mga pasidungog sa 18th Cebu Archdiocesan Mass Media Awards (Camma) nga gipahigayon SM City Cinema 1 ang nalangkat sa Superbalita Cebu ug SunStar Cebu.

Ang SunStar Cebu mihagpat sa tulo ka award sa English ca­tegory nga mao ang editorial Writing, Column Writing (Evelyn Luab sa “Light Sunday”) ug sa Special/Investigative Writing ni Cherry Ann Lim, managing editor.

Sa habig ning mantalaan, mapasigarbuhon nga gipupo ang lima ka mga pasidungog nga gipangulohan ni Sheila Gravinez kinsa miharos sa duha ka awards. Kini mao ang News Writing ug Special/Investigative Writing sa Cebuano.

Wa usab magpa-iwit si Ogherty Lopez nga mihapo sa Feature Writing sa Cebuano category ug ingon man mibunga usab ang kahanas ni Ariel Itumay sa Editorial Cartooning.

Kon unsa ang ilang nakab-ot, mao usab kini ang nahimo ni Jaybee Binghay kinsa mao ang mipatugbabaw sa indigay sa Co­lumn writing sa Cebuano.

Tungod ning maong mga pasidungog, nisamot ang among kadasig sa pag-alagad diha kaninyo ug sa gihapon way lubad namong gidawat ang mga hagit aron ipadayon ang tinud-anay nga serbisyo alang sa katagbawan sa tanan.

Kami sayod nga kini dili namo makab-ot kon wa ang inyong subsob nga suporta nga maoy nagtisok og pagsalig diha kaninyo. Niini, hugot natong panghinauton nga kining tanan magpadayon ug molambo pa. Daghang salamat.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph