Editoryal: Si Pacquiao ug ang LGBT

DAKONG posibilidad nga makaapekto sa kandidatura ni Filipino boxing icon Manny Pacquiao ang iyang kontrobersiyal nga pamahayag nga nag-insulto ug nakapaulbo sa kaspa sa mga sakop sa lesbian, gay, bisexual and transgender kun LGBT dili lang dinhi sa Pilipinas kon dili apil na usab sa ubang kanasuran.

Sa usa ka interview, ang kongresista sa distrito sa Sarangani Province kinsa magpapili pagka-senador sa umaabot nga piniliay mipadayag sa iyang dakong pagsupak sa "same sex marriage."

Apan ang nakapatingkag ug nakapasaka sa dugo sa mga sakop sa LGBT mao ang iyang pamahayag nga mas maayo pa ang mga hayop kay makamao pang moila ug mopili og babaye o lalaki ba. Tungod niini, nabulit sa pagsaway ug pag-atake ilabi na gikan sa mga inilang sakop sa LGBT ang eight-time world boxing champion.

Lakip sa mipadayag sa iyang kasagmuyo mao ang TV host nga si Vice Ganda ug ang kanhi child star ug acoustic singer Aiza Seguerra kinsa daling nanawagan sa pag-boycott ni Pacquiao sa umaabot nga piniliay.

Tuod man, sa kabalaka nga namilegro ang iyang kandidatura, daling nangayo'g pasaylo si Pacquiao ug nanghinaut nga makabawi sa dakong kasaypanan nga iyang nahimo bisan pa man og nagpabilin ang iyang pagsupak sa same-sex marriage.

Mahimong gipasaylo si Pacquiao sa mga LGBT tungod sa iyang bati ug insultong pamahayag apan wa kini magpasabot nga botaran siya niining grupoha.

Ang pamahayag nga dili siya gusto og same-sex couples, nagpamatuod nga anti-LGBT siya. So natural nga di siya makapaabot og suporta ning maong pundoka.

Sa uwahing survey, no. 7 si Pacquiao sa mga senatorial candidates. Tan-awon nato kon motidlom ba ang iyang position sa sunod nga survey.