WA magkadimao ang testimonya ni Edgar Matobato, ang nangangkon nga hitman ni kanhi Davao City mayor ug karon Presidente Rodrigo Duterte, sa Senado sa niaging adlaw.
Makalibog ang iyang gipanulti tungod kay sa dihang sila na si Senador Peter Alan Cayetano ug Panfilo Lacson ang misukit-suki gawas nga nag-usab-usab sa intonada sa iyang mga pamahayag wa pa gyud matukma ang iyang gipanugilon.
Pananglitan, iyang giingon nga apil siya sa grupo sa kamatayon ni Richard King, ang Sugboanong negusyante nga gipatay didto sa Davao City.
Apan sa unsang pagkaunsaa nga dili man mao ang dapit nga iyang gihinganlan kon diin patya si King.
Laing di katuohan nga testimonya mao ang pagtug-an niya nga nagdala ang DDS (Duterte Death Squad) og usa ka international terrorist nga gihinganlan og Sali Makdum sa opisina sa Presidential Anti-Organized Crime Task Force (PAOCTF) niadtong 2002.
Ingon niya nga si Philippine National Police (PNP) chief si Ronald dela Rosa mao pay dako sa PAOCTF niadtong panahona diin ila usab nga napatay si Makdum.
Dugang saysay niya nga permi siyang mag-adtoan sa buhatan sa PAOCTF ug nga kaila kaayo siya ni dela Rosa kay suod kini sa ilang lider nga gihinganlan og Arthur Lascanas.
Pero nasuta nga ang PAOCTF nabungkag na diay niadtong 2001 ug kon si dela Rosa usab ang pasulti-on nga wa man siya kaila niining Matobato ug Lascanas.
Apan ang labawng makapaduda sa tanan mao ang gipakita ni Senador Leila De Lima ug Antonio Trillanes III sa mga palpak nga pamahayag ni Matobato nga daw sa modepensa sa mga sayop ni Matobato.
Mahimong dunay kasayuran si Matobato sa pipila ka binuhatan sa mga Duterte sa Davao apan sa iyang pagyagyag sa mga butang nga wala siya masayod ug masuheto ug ilabi na nga dili tinuod maoy nakapalubog na hinuon sa pagpalutaw sa kamatuoran.
Di gani makasulti kon giunsa ug si kinsa kadtong tawo nga iyang unang giduolan ug nitabang kaniya aron mamahimo siyang witness sa Senado.