GITAHASAN ni Lapu-Lapu City Mayor Paz Radaza ang City Attorney’s Office (CAO) nga mosusi sa posible nga lakang nga himuon batok niadtong nagpakatap og fake news sa Facebook sa giingong bomba nga napalgan nga niresulta sa pagkaukay sa publiko.
Napungot ang mayor sanglit naghatag kinig negatibo nga impresyon sa Lapu–Lapu City ilabi na nga di kini maoy unang higayon nga nikatap ang sayop nga taho diin unang insidente mao kadtong spotted nga giingong sakop sa Abu Sayaff sa usa sa mga barangay sa isla sa Olango.
Di mapanuko ang city hall sa pagpasaka og kaso batok sa responsable sa pagsabwag sa sayop nga balita nga nakamugna og negatibo nga epekto sa siyudad ilabi na sa natad sa turismo sa pagtuo nga nasudlan og terorista sa dakbayan.
“Gi-look into na karon sa atong city legal kay daghan og kadautan ang mahimo out of this (fake news),” tipik sa pamahayag ni Radaza atol sa press conference kagahapon.
Niadtong Martes nagkaguliyang ang pipila ka mga residente ug motorista sa Barangay Basak ug trapiko gipahunong samtang presensiya sa mga unipormado nga SWAT Team sa city police office ang nagbahasbahas sa area tungod sa giingong bomba.
Lakip ang netizens naalarma sa gi-post sa usa ka nagpatuong legitimate media sa ilang Facebook post nga “Bomb alert!” (FVQ)