DILI na bag-o alang kang Floyd Mayweather ang pagpanghatag og luhong mga regalo.
Busa dili kahibulngan nga manghatag siya’g bahin sa iyang katigayunan ning panahon sa Kapaskuhan ngadto sa iyang labing paboritong mga tawo – strippers.
Ang kanhi pound-for-pound boxing champion mibutho sa V Live Detroit niadtong Dominggo (Sabado sa gabii sa US) dala ang tag 100 dollar bills nga nagbalor og $40,000 o dul-an sa P2 million.
Misaka siya sa stage ug nagpauwan og kuwarta nga milanat og usa ka oras.
Sa taho sa TMZ Sports, giingon nga si Mayweather adunay labing paboritong dancer sa club nga ginganlan og LuvHonesty, kinsa pesonal niyang gihatagan og $20,000.
Sa laing bahin, gitataw ni Mayweather nga dili na siya mahaylo nga mobalik og away gumikan kay mas importante alang kaniya ang iyang kahimsog.
Miretiro si Mayweather niadtong Septiyembre sa miaging tuig apan daghan ang misuway paghagit kaniya nga mobalik og away lakip na niini ang Pambansang Kamao sa Pilipinas nga si Manny Pacquiao, kinsa iyang gilupig pinaagi sa unanimous decision.
Gawas kang Pacquiao, gusto sab nga makig-away kang Mayweather sla si Saul ‘Canelo’ Alvarez ug Gennady Golovkin lakip na ang mixed martial arts superstar Conor McGregor.
“I think it’s very valuable fact that I left boxing in great condition, and I left boxing on my own terms. I did what I wanted to do and in one night I got a check for 100 million dollars. But you know what, my health is more important,” matod ni Mayweather nga napatik sa www.boxingscene.com.
Si Mayweather miretiro nga wala’y pilde sulod sa 49 ka mga away nga gibuwakan og 26 ka knockouts.