INILA kaayo ang Luneta Chess Park alang sa mga chessplayers nga gadayo sa kaulohan.
Didto magtambay ang mga maayong laki nga manunuwa sa chess. Aduna sab mga hustler nga kalit lang manguhit nimo aron makigdula.
Mga chess tables gigama sa sinaw nga semento, samtang ang chess board gihimo sa marble sama ana karon sa Misamis Oriental Capitol Chess Park.
Limpyo pa kaayo ang chess park sa dekada 90, diin niadtong panahon gabisitahan sa mga inilang grandmaster sa kalibutan.
Mismo ang World Chess Champion niadtong dekada nga si Gary Kasparov nakabisita sa Luneta Chess Park diin giduyogan siya ni Fide president Florencio Campomanes.
Mao man tong panahon nga sa Manila gipahigayon ang 1992 World Olympiad diin ang Pilipinas nag-host sulod sa administrasyon ni Corazon Aquino.
Sa nagkalabay ang mga panahon, nakurat ko nga bati na ang parke. Dili na kaayo mahitsura parehas sa una.
Didto ako adtong Oktobre niaging tuig para mag-apply og US Visa. Human sa akong transaksyon, nidalikyat ko kadyot sa chess park aron mahimamat nako akong mga higala nga chessplayer labina katong mga Kagay-anon.
Hesus maryosep, nakita nako nga dili na maayo pagdumala sa chess park. Hinaut dili mahitabo diha sa Capitol Chess Park.
Hinuon, usa kana sa mga lakang sa bagong napili nga opisyales sa Explore Misamis Oriental Chess Club nga malimpyo kanunay ang chess park.
Hinaut sa dili madugay.