SA SINUGDANAN, gikalipay nato ang plano sa atong Presidente sa dihang gibutyag niya ang pagtaas sa sweldo atong mga pulis tungod kay wala paman kita mahibalo kon asa kita niya kuhaan hangtud sa ngadto ngadto nahimugso ang Tax Reform Acceleration and Inclusion (Train).
Mao kini ang idea sa mga economic adviser sa atong halangdong Presidente kay asa man tuod ta magkuha og pundo para idugang sa sweldo sa atong mga kapulisan?
Nindot ang paagi sa sinugdanan, dili na buhisan ang mga empleyado nga nagdawat ug sweldo nga P20,172 matag bulan, o P250,000 sa iyang annual nga income.
Apan sa dihang gipatungan na usab ang buhis ang lana nga excise tax, gawas sa value added tax (VAT) ug ang pagtaas sa uban pang mga paliliton, sama sa beverages, coal ug uban pa, labaw pa ang kantidad nga gikaltas sa atong buhis matag tuig kon itandi sa mga mga nagmahal nga palaliton resulta sa Train.
Ang mga kabus ug pinakapobreng Pilipino ang maligsan sa Train, ang pagahin ni Budget Secretary Benjamin Diokno og P24,6 billion nga subsidy
nga tag P200 matag kabus nga pamilya, pagmatuod na kini nga mga kabus ug timawa ang naligsan sa ilang gimugnang train, di ba?
May epekto na karong panahona, ang soft drinks nga family size nga tag P18 lang, karon P24 na.
Ang pinakasakit nga epekto sa dili madugay atong matagamtaman ang pagtaas unya sa presyo sa gasolina, didto sa Palawan sumala sa atong nabati nagsugod na sila sa pagbaligya sa tag P62 ang matag litro sa gasolina, P52 sa diesel.
Doblado versus doblado, gidoble sa atong gobyerno ang sweldo sa atong kapulisan nga ubos og ranggong pulis, doble usab ang antuson sa mga pobreng Pilipino nga masugamak sa presyo sa mga nag-unang palaliton.
Gawas sa Train, aduna pay programa ang atong gobyerno ang Jeepney modernization nga dungan sa pag-implementar sa Train niining tuiga.
Sa atong pagpakighinabi sa pipila ka operator, plano nila gikan sa P8 ang minimum nga pasahe, itaas nila ngadto sa P12 o P13.
Para nako, makatarunganon sila tungod kay inutang na ang bag-ong unit nilang jeep, tagaliog pa ang presyo sa gasolina. Ug kumusta man kamong nagdawat og minimum nga suholan may huhungihong ba nga itaas ang minimum wage?
Bisan pa og dugangan og P200 ni Budget Secretary Benjamin Diokno ang
P1,400 nga 4Ps sa atong mga kabus nga pamilya dili makasapal sa kalisud nga ilang abuton inig-implementar na sa Train ug Jeepney modernization, plus mangita pa og pundo daw para sa usbaw nga sweldo sa atong mga magtutudlo.
Unsa na usab kaha ang pahamtangan og buhis sa mga bright nga economic adviser sa atong presidente kon mahitabo ka na, mga pobre ug timawa ang giduot pag-ayo sa atong gobyerno para lang doblehon ang sweldo sa mga unipormado, ug uban pang kawani sa atong kagamhanan.