USA ka dalaga ang nireklamo og pagpanglugos batok sa usa ka sundalo ug gi-text pa siya niini og “pangit” ug “walay lami” human sa nahitabo.
Si Cindy (dili tinuod nga pangalan), 19, nagpuyo sa usa ka lungsod sa Misamis Oriental ug usa ka tinun-an sa criminology ang nitaho sa kapolisan human sa hitabo.
Nagpakitabang sa kapolisan uban sa iyang inahan ang biktima human giingong gilugos sa iyang chatmate nga sundalo nga naila lamang sa ngalan nga Bryan kinsa giingong nadestino sa usa ka balay tambalanan ning dakbayan sa Cagayan de Oro.
Saysay ni Cindy nga naila niya si Bryan sa online site nga Date in Asia ug dihang nagbinayloay og mensahe naghinatagay sila og cellphone number hinungdan nagsige na usab dayon tawag kaniya si Bryan.
Diretso kining nanguyab kaniya apan nagduha-duha sa pagsugot si Cindy tungod kay bag-o pa kaayo niyang naila gawas pa wala pa sila nagkita apan namugos kini nga sugton siya tungod kay sa pag-uyab gihapon ang giingong ilang padulngan.
Dihang mianhi ning dakbayan sa Cagayan de Oro si Cindy nagkasabot sila nga magkita unta sa usa ka mall apan gidala siya ni Bryan sa usa ka motel ning dakbayan diha sa Kauswagan ug didto nahitabo ang wala niya gidahom.
Matud sa biktima nga gipugos siya sa suspek paghimo sa butang nga himuon sa magtiayon.
Human sa nahitabo gihatod pa sa suspek ang dalaga paingon sa terminal sa bus ug gisultihan pa kini nga padalhan kini og kwarta nga posibleng bayad sa gihimo niini.
Matud ni Cindy nga wala siya nakasulti diretso sa iyang inahan sa nahitabo kaniya dinhi sa dakbayan tungod sa kahadlok apan kay dili niya maagwanta misulti sa kadugayan hinungdan nga gipa-record sa kapolisan.
Apan ang inahan sa biktima nibulgar na sa hitabo tungod kay pakadawat na sila og bahad gikan sa naasoy’ng sundalo lakip na ang mga pagpanghulga.
Gani giingong nag-sorry ang sundalo kanila ug mihangyo nga mobayad og P8 mil i-atras lamang ang kaso nga ilang ipasaka.
Usa sab ka ayaan ni Bryan ang giingong lakip sa mihulga sa iyang anak mao ang pag-ingon nga dili kini makasulod pagkapolis kon mogradwar kay iyang babagan.
Lakip sa gikasakit ni Cindy tungod kay dihang ilang gipasakaan og kaso si Bryan mitext pa kini og “pangit” ug “walay lami.”
Imbestigahan
Si Philippine Army’s 4th Infantry Division spokesman Joe Patrick Martinez nisulti nga ilang pangitaon ang maong sundalo kung sakop ba gayud sa ilang dibisyon labina nga ang pangalan nga miabot kanila wala sa ilang listahan.
Hinuon gipasalig ni Martinez nga imbestigahan kini tungod kay isip usa ka sundalo daw dakong kasupakan sa balaod ang gihimo niini.