INAHAN nidangop sa Talisay Police Station ug nipasangil sa pagpabaya sa mananambal sa Talisay District Hospital nga maoy iyang gibasol sa kamatayon sa 10 anyos niyang anak nga lalake.
Ang tambalanan nihimo na hinuon sa ilang imbestigasyon labot sa maong hitabo.
Si Lorna Palagtiosa, taga Sityo Kasagingan, Lawaan 3, dakbayan sa Talisay, niadto sa police station kagahapon sa buntag aron pormal nga mopasakag reklamo batok sa usa sa mga doktor sa ospital.
Matod pa niya, iyang gidala ang iyang anak nga si Harvey Jarkin, sa Talisay District Hospital niadtong Agusto 23 tungod kay nagmulo sa sakit sa tiyan.
Apan ang doktor mihatag lang og resita para sa sakit sa tiyan aron kini maalibyuhan.
Gumikan kay sila naniguro, nakahukom sila sa iyang bana nga anha lang una sila sa emergency room sa tambalanan magpabilin uban sa ilang anak.
Bisan sa tambal, nagsakit gihapon ang tiyan ni Harvey.
Sa sunod adlaw, giingnan sila sa doktor nga operahan ang ilang anak tungod sa giingong appendicitis.
Usa ka doktor, kansang ngan gipugngan lang una sa Superbalita Cebu tungod kay wa pa makuhai sa iyang habig, maoy nag-opera niadtong Agusto 27, alas 4 sa hapon.
Human sa duha ka oras, gipahibawo sila nga malampuson ang operasyon sa ilang anak.
Giresitahan na usab sila og mga tambal nga ilang gipalit.
Apan paglabay sa pipila ka oras, gipatawag na usab sila sa doktor sa operating room.
Giingnan sila sa mananambal nga ibalhin sa laing tambalanan ang ilang anak, kanang kompleto og mga kahimanan.
Sa sunod adlaw Agusto 28 sa tungang gabii, ang ilang anak gibalhin sa South General Hospital sa siyudad sa Naga, apan didto gideklarar nga patay nang midangat sa tambalanan.
Sa dihang gihimo ang pag-autopsy sa lawas, nasuta nga ang namatyan tungod sa internal bleeding sa tiyan sa bata ug blood clot sa utok.
Matod sa report, multiple organ failure secondary to immediate complication of surgical procedure ang namatyan.
Si Lorna niingon nga anaa naablihan nga tinai sa iyang anak nga wa na naatiman sa mga doctor.
Sa ilang bahin, si Dr. Joannes Paul Miranda, chief medical professional staff 2 sa ospital, niingon nga nihimo na silag internal investigation sa maong hitabo.
Apan ilang gipasalig nga sila sa tambalanan ug mga doktor nihimo sa tanan aron pagluwas sa ilang pasyenti ug di nila tumong nga mohimog dautan sa ilang mga pasyente.
Iyang gidugang nga ila nang gipakigkitaan ang mga ginikanan sa miaging semana.
Ilang gipasabot labot sa hitabo ug ila na usab nga gipatawag ang doktor nga nahitungdanan. (DRT)