GILIBOT sa Philippine Drug Enforcement Agency-Northern Mindanao lakip Martial Law Special Action Group (MLSAG) ug uban unit ang kabalayan sa Barangay Barra, lungsod sa Opol, Misamis Oriental, aron ipaubos sa inspection labina dinhing lugara ang daghan og mga bakwit gikan sa Marawi nga natala.
Si Police Chief Inspector Ariel Phillip Pontillas, sakop sa MLSAG, nibutyag nga wala silay dala nga mga search warrant apan igo lamang silang motoktok sa mga kabalayan aron mosusi kung aduna bay mga kadudahan sulod sa mga balay.
Kini aron masiguro nga walay mga tawo nga kadudahan nga nakasulod sa barangay human nadawat ang mga report nga basin unya og nasagolan na ang dapit sa mga sakop sa terorista.
Kahinumduman basi sa record ang Barra ang adunay pinakadaghan nga bakwit sa Misamis Oriental.
Ang gihimo niini mao ang pro-active measures bisan pa walay inpormasyon. Gisiguro usab niini nga maadtoan ang tanan nahimutangan sa bakwit aron sab masusi labina alang lang man sab kini sa ilang seguridad.
"Ang mga tao gani sa dapit nalipay nga amo sila gisusi. Sila paman gani mi-offer nga among susihon ilang balay." matud ni Pontillas.