IG-AGAW giluba patay sa iyang ig-agaw dihang nasakpan nga nakigdulog sa iyang kapuyo sulod sa ilang balay kagahapon sa alas 2 sa kaadlawon sa Sitio Sapasili, Barangay Mantija, dakbayan sa Danao.
Si Edwin Labador Matugas, 33, laborer, namatay human namuok asa iyang buko-buko ang kutsilyo samtang nilayas ang iyang ig-agaw nga si Vicente Lavador Manco, drayber.
Si PO1 Jefferson Guinsisana, desk officer sa Danao Police Station, nagkanayon nga si Vicente sayo nga nibiya sa ilang balay kay motrabaho unta.
Apan nibalik kini ug maoy iyang naabtan si Edwin ug ang iyang kapuyo nga nagdulog hinungdan nga nagkalalis silang duha.
Ang suspek nga nagdalag kutsilyo diretsong niluba sa biktima tumong sa buko-buko, dapit sa may tuong abaga.
Human sa pagpanunggab, si Vicente nisibat samtang ang kapulisan gipahibawo na lang sa mga silingan mga alas alas 6:30 kagahapon sa buntag.
Si PO3 Marlon Remollo, imbestigador sa Danao Police Station nga nahinabi sa Sun.Star Superbalita niingon nga “love triangle” ang motibo sa krimen human nahibaw-an sa suspek nga ang iyang kapuyo dunay relasyon sa iyang ig-agaw.
“Bag-o lang daw nakahibalo ang suspek nga ang asawa niya gikarelasyon sa iyang ig-agaw,” dugang ni Remollo.
Ang impormasyon nakuha nila gikan sa usa ka barangay konsehal niingon nga nahibaw-an sa suspek ang mga estorya kabahin sa iyang asawa.