SUPAK ug nisaway ang environmentalists sa paggamit sa Ms. Universe sa whale shark watching sa lungsod sa Oslob, isip usa sa dapit nga bisitahon sa mga kandidata nga destinasyon sa nasod.
Kagahapon, gibisita sa mga kandidata ang maong dapit isip parte sa swimsuit competition sa mga kandidata.
Si Anna Oposa, kinsa co-founder ug executive director sa Save Philippine Seas, niawhag sa organizers sa Ms. Universe nga dili gamiton ang footage sa mga kandidata nga nisawom kauban ang mga butanding.
Giisip na kaniadto paman sa maong organisasyon nga kontrobersiyal ang whale shark watching sa Oslob tungod sa pamaagi sa pagpakaon niini diin nga nakabalda kini sa naandan o natural nila nga pamaagi isip usa ka migratory species.
Giingon usab nga ang maong aktibidad sa turismo, nagpabilin kini nga wala gi-regulate.
Matod ni Oposa nga tungod kay tibuok kalibutan ang lakip sa mga kandidata sa maong tinuig nga beauty pageant, maghatag og dugang turista ang I-promote niini nga mga tourist sites.
Nabalaka karon ang Save Philippine Seas nga kon modaghan pa ang turista sa Oslob, mapadayon ug mograbe ang problema nga gihimo karon sa mga butanding.
Dugang ni Oposa nga daghan og maanindot nga talan-awon ang nasod nga mamahimong ipa-usab sa tibuok kalibutan, dili unta ipakita sa tibuok kalibutan nga wala'y pake o wala nag-atiman ang Pinoy sa marine wildlife.