WALAY nakapiog sa pagpangigo ni Guizo barangay councilor Josac Arong samtang maayo usab nga nakasuporta si Lyle Vasquez aron aswaton ang Barangay Guizo ngadto sa 71-66 nga kadaugan batok sa Ibabao-Estancia, 71-66, aron sakmiton ang titulo sa 1st Governor’s Cup 6th District Champions League 40-years above didto sa Mandaue Sports and Cultural Complex.
Sa sayo pa, midaog ang barangay Paknaan batok sa Opao nga gipangulohan sa Cebu three-point king Felix Duhig, 77-68 alang sa ikatulong pwesto.
Si Arong mitapos sa duwa nga may 19 puntos ug midugang usab og 13 si Vasquez alang sa kadaugan sa Guizo.
Laing nakahatag og igong suporta si Joy Olofernes ug ingon man si Jerwin Espina nga nagkumboya og 16 puntos samtang nangulo sa pildirong Ibabao-Estancia ang kanhi Warrior nga si Dennis Patindol nga may 17 puntos.
Subay niini, ang mga tigpasiugda sa torneyo nga pinangulohan ni Sixth District Provincial Board Member Glenn O. Bercede nagkanayon nga ang Guizo makingsangka sa kampyon sa Consolacion ug sa Cordova legs sugod karong Nobiyembre 4.
Ang Guizo nakadawat og ganting cash nga P12 mil samtang ang Ibabao-Estancia nakadawat og P8,000.
Ang Paknaan mibulsa og P5,000 ug ang Opao nakabira og P3,000.
Ang kampyon sa Champion League makadawat of P20 mil diin ilang ipatuman ang home-and away format.
Puntos matag usa: Ikaduhang Duwa: (Championship)
Guizo (71) - Arong 19, Vasquez 13, Olofernes 9, Espina 7, Cabrera 4, Estrobo 3, Neri 3, Seno 3, Espina 2, Porlas 2, Mendoza 2. Ibabao-Estancia (66) - Patindol 17, Reyes 10, Capada 7, Casal 7, C. Soco 5, Teves 5, Lumapas 4, Soco 3, Sy 2. (PR)