KULBAHINAM nga nalangkat sa Gulf Lubricants ang kampyonato sa Arome Philippine Trade Sales (APTS) Ballclub 4th season human nila pukana ang ENI Lubricants, 82-79, sa championship game sa niaging semana diha sa San Roque gym, dakbayan sa Sugbo.
Human sa sikit nga panag-engkuwentro nga milanat og kapin sa tulo ka mga quarters, ang Gulf Lubricant nga gipangulohan ni Steve Remedios, nakakita og gamayng lungang nga maoy ilan gihimong agianan ngadto sa kadaugan.
Si Remedios kinsa maoy nahimong most valuable player sa maong torneyo, miyagyag og 25 puntos, samtang si Jerec Kilat mikablit usab og 20 puntos alang sa Gulf Lubricant.
Miabag usab sila si Kent Samili ug Alex Amaga nga may tag 12 ug 10 puntos matag usa.
Ang APTS gikatakdang mopahigayon og laing torneyo sunod buwan.
Mga puntos:
Gulf Lubricant (82) - Remedios 25, Kilat 20, Samili 12, Amaga 10, Pepito 6, Emman 4, Perpetua 2, Peter 2, Sonny 1. Eni Lubricant (79) - Maiz 18, Manila 17, Arogones 8, Ologuin 7, Totoy 5, Sulian 4, D. Ologuin 2. (PR)