KORONADAL CITY -- Gisugdan na sa HIV-Aids Core Team o HACT sa South Cotabato ang pagpanghatag og libre nga anti retroviral drugs sa mga nagpositibo sa human immunodeficiency virus (HIV) sa probinsiya.
Suma ni John Cudilla, HIV-Aids focal person sa South Cotabato nga dili na kinahanglan sa mga pasyente nga moadto sa Southern Philippines Medical Center sa Davao City aron makapahimulos sa libre nga pagpatambal.
Moabot sa 67 ka mga nagpositibo sa HIV ang nakabenepisyo karon sa libre nga anti retroviral medicine sa HACT.
Nasayran nga ang ubang pasyente niini nagagikan pa sa ubang dapit nga gi-indorso sa Research Institute for Tropical Medicine o RITM.
Gitin-aw ni Cudilla nga ang HACT mao ang usa sa primary health facility nga nahimutang sa South Cotabato Provincial Hospital sa Koronadal City.
Kini, suma pa, ang satellite Hub sa RITM nga otorisado nga manghatag og anti retroviral medicine sa mga pasyente sa HIV.
Nahibaloan nga sa kapin duha ka libo ka tawo nga gipailawom sa voluntary HIV testing sa South Cotabato karong tuiga lang, 97 niini ang reactive o kinahanglan pa ang dugang test.
Miapela si Cudilla sa katawhan nga dunay "risky sexual behavior" nga moadto sa HACT ug magpa-HIV test.
Giseguro sab ni Cudilla ang confidentiality sa bisan kinsa nga mangayo'g tabang sa buhatan sa HACT sa probinsiya. (EEF)