USA ka temporaryong modular housing nga proyekto ang tukuron unya sa kagamhanan sa dakbayan sa Mandaue alang sa mga biktima sa sunog sa Barangay Guizo ug Mantuyong kinsa kasamtangang nanimuyo gawas sa Cebu International Convention Center (CICC).
Matod ni Atty. Jamaal James Calipayan, executive assistant ni Mandaue City mayor Jonas Cortes nga ang maong proyekto maoy kasamtangang puy-anan sa mga biktima sa sunog samtang nagpadayon ang site development sa lugar nga nasunugan.
Nasuta ning mantalaan nga mokabat ngadto sa P72 milyones ang budget sa maong proyekto nga kuhaon gikan sa calamity fund sa dakbayan.
Si city engineer Andres Suson nagkanayon nga adunay 5 unit ang temporaryong modular housing o transitory house diin matag unit may 45 ka mga lawak.
Kini nagpasabot nga may 225 ka lawak ang mahimo sa proyekto nga tukuron ra sab kilid sa lugar nasunugan.
“Investment pud ni sa city kay magamit mani in case naay mga big disaster,” dason ni Calipayan sa mga tigbaliyta nga ang pasilidad magamit hangtod sa lima ka higayon ug i-assemble pagbalik.