GIBINAT sa Cleveland Cavaliers ang ilang ika-lima nga sunod-sunod nga daug human gitadyak nila ang Memphis Grizzlies, 103-86, atol sa 2016-17 National Basketball Association regular season niadtong Martes, Disyembre 13, didto sa Quicken Loans Arena, home sa Cavs.
Nitala na sab og double-double si Kevin Love agi sa 29 puntos ug 13 ka rebounds, samtang nihatag sab sila Lebron James ug JR Smith og 23 puntos matag usa.
Nisugod pagdiktar ang Cleveland sa dula agi sa 14-4 run sa kataposang bahin sa unang kwarter aron makakuha og 12 puntos nga labaw pagsirado sa maong kwarter sa iskor 32-20.
Gikuptan pa og maayo sa Cavs ang labaw sa ika-tulo nga kwarter ug gihugtan pa ngadto sa ilang kinataas nga labaw sa dula nga 21 puntos, 99-78, sa tulo ka minutos nabilin sa kataposang kwarter.
Dako na kaayo nga labaw alang sa Cavs nga dili na maapsan sa Memphis.
Nag-una lang gihapon ang Cavs sa east nga adunay 18-5 win-loss record, samtang naa lang gihapon ang Memphis sa ika-lima sa west nga adunay 17-9.
Sa pikas bahin, nilambo na ang Golden Warriors sa 22-4 aron pabiling mag-una sa west human giparot nila ang New Orleans Pelicans, 113-109.