COTABATO CITY -- Sadya, malinawon ug mabulokon ang kalampusan sa Inaul Festival sa probinsiya sa Maguindanao nga gipangulohan mismo ni Governor Esmael "Toto" Mangudadatu.
Nagpasalamat si Governor Mangudadatu sa mga lokal opisyal, katawhan, tanang ahensiya ug organisasyon nga mitabang aron magmalampuson ug mabungahon ang selebrasyon sa pinaka-una nga Inaul Festival.
Samtang nagpasalamat sab si Lynette Aguilar Estandarte, provincial budget officer, kang Governor Mangudadatu nga anaa kanunay nga nagpaluyo sa ilang paningkamot alang sa malampuson nga selebrasyon.
Sa pikas bahin, nahimong grand champion ang contingent gikan sa North Upi, Maguindanao sa Dindang sa Lalan, Street Dancing Competition and Showdown sa mga kontes sa kalingawan nga gidalit atol sa festival.
Matud ni Leonila de Losa, chairman sa Dindang sa Lalan nga P250 mil ang cash prize ug trophy ang nadawat sa North Upi isip grand winner.
Samtang second place sab ang mga misalmot gikan sa South Upi nga dunay ganti nga P150 mil ug tropeyo ug third place ang mga mananayaw gikan sa Datu Piang nga dunay premyo nga P100 mil.
Sa Float Design Competition, nanguna ang Datu Piang gikan sa 17 ka mga sumasalmot nga nakadawat og premyo nga P100 mil.
Second place sa float design contest ang Northern Kabuntalan nga nakabulsa og P75 mil samtang 3rd place ang North Upi nga midaug og P50 mil. (Edgar E. Fuerzas)