NAKATAY-OG sa industriya sa pabuto sa Barangay Babag, dakbayan sa Lapu-Lapu ang kamanduan nga giluwatan sa Department of Labor and Employment (Dole) nga tak-upan ang firecracker companies sa nasud.
Ang Babag nahimong inila nga source sa pabuto ug maoy nag-unang panginabuhian sa mga residente sa dapit.
Si Babag Barangay kapitan Epifania Augusto nagkanayon nga di grabeng maapektuhan ang firecracker industry sa ilang dapit sanglit kadaghanan sa mamuhatay og pabuto aduna usay abilidad sa paggama og pyrotechnics (firework display).
“Naay effect pero di dako. Naa tay residents kahibawo og pyrotechnics,” tipik sa pamahayag ni Augusto sa Sun.Star Cebu.
Gumikan sa kamanduan sa Dole gihunong una sa Babag ang pag-isyu og permit to display og pabuto sa maong dapit.
Nipadayag sab og kahinugon si Augusto tungod kay adunay taas nga demand ning panahona sa firecrackers ilabi na nga nagkaduol ang kasaulogan sa Pasko ug Bag-ong Tuig.
Nasayran nga kadtong molukat og permit mobayad og P215 aron tugtan nga makapamaligya og pabuto. uban sa taho sa Sun.Star Cebu