USA ka 64 anyos nga Hapon ang namatay samtang kini nag-scuba diving didto sa kadagatan sa isla sa Olango, dakbayan sa Lapu- Lapu niadtong Lunes sa hapon.
Ang biktima giila nga si Kenichi Nakaizumi, usa ka professional diving instructor gikan sa Yamaguchi, Japan ug kinsa kasamtangang nanimuyo sa La Place Guesthouse sa Brgy. Maribago.
Gitataw nga wa na maresponde sa medical team ang biktima sa dihang kini gitabang, base sa imbestigasyon ni PO2 Marven Saraum sa homicide section sa Lapu- Lapu City Police Office (LLCPO).
Sa imbestigasyon ni Saraum sa maong insidente nga nahitabo pasado ala una sa hapon, nasuta nga si Nakaizumu uban sa iyang higala nga si Dino Ompad, operation manager sa Scuba Star sa Maribago sa dakbayan.
Matod ni Ompad nga gitawag siya sa usa ka boatman samtang anaa pa siya sa dagat tungod kay naglisod na og ginhawa ang biktima. Niini dali sila nga midunggo sa Parker Beach sa Brgy. Marigondon ug daling gidala sa Mactan Doctors’ Hospital si Nakaizumi apan pag- abot sa maong tambalanan, gideklarar na kini nga dead-on-arrival (DOA).
Base sa findings, giatake sa kasingkasing ang hapon.
Nasuta sa kapulisan nga adunay gi-maintain nga tambal ang maong biktima base sa ilang narekober sa lawak nga gipuy-an niini. Aduna usay nakuha nga medical record sa biktima nga nagpamatuod nga nakasinati na kini og heart failure.
Si Nakaizumi usa ka professional diving instructor sa Confédération Mondiale des Activitiés Subaquatiques.
Ang lawas sa biktima kasamtangang gidala sa Cosmopolitan Funeral Homes sa Brgy. Pajo sa dakbayan alang sa autopsy.
Sa laing bahin, usa ka lawas ang nakit-ang naglutawlutaw sa may sapa sa Mahiga Creek mga alas 10 sa buntag niadtong Martes.
Usa ka lumolupyo sa Sitio Mahayag, Brgy. Subangdaku sa dakbayan sa Mandaue nga si Ronie Zuniega, 40 anyos, minyo, ang nangayo ug pakitabang sa kapulisan human niya makit- i ang maong lawas.
Sa imbestigasyon sa kapulisan sa Station 3 sa Mandaue City Police Office (MCPO) nga ang naglutaw nga lawas giila nga si Victor F. Madaiton, 45, minyo ug lumolupyo sa Univille Kasambagan, dakbayan sa Sugbo.