ANG wala pagpakabana sa Armed Forces of the Philippines (AFP) ug ang Malakanyang ang maong hinungdan nganong nadugay ang pag release sa Prisoner of War (POW) nga si Army Corporal Adriano Bingil Jr. sulod sa 104 ka adlaw ilalom sa kustodiya sa New People’s Army (NPA).
Mao kini ang pamahayag ni Jorge Madlos, o mas nailhang si Ka Oris, ang tigpamaba sa National Democratic Front (NDFP) sa Mindanao. Ang NPA mao ang armadong kalihukan sa NDFP ug Communist Party of the Philippines (CPP).
“Sumala sa mga opisyales sa 4th ID, wala sila'y katungod nga modeklara sa Somo (Suspension of Military Operations) kay ang sibilyan lang nga otoridad ang dunay gahum sa pag-isyu niini, busa, nagdeklara sila'g ‘Stand Down Order,’” matud ni Ka Oris.
Ang pamahayag ni Ka Oris gibasa lamang sa kauban niini sa NPA niatong adlaw nga gi buhian si Bingil gumikan kay wala siya didto sa lugar.
“Nagdumili ang AFP ug Malakanyang sa pagkoopera alang sa luwas ug hapsay nga pagbuhi sa mga POW pinaagi sa pagdeklara og Somo-Sopo tungod kay dili niini gustong ilhon ang pulitikanhong gahum nga naabot sa rebolusyonaryong kalihokan. Nagpakita usab kini sa kawalay pagpakabana sa kaayohan sa ilang mga sundalo nga nahimong POW, gawas tingali kung mga dagkung opisyales na ang mahimong POW,” dugang pa niya.
Gibuhian si Bingil sa NPA niadtong Disyembre 31, 2015 sa Barangay Durian, Las Nieves, Agusan de Norte, human sa malampusong negosasyon sa mga third party negotiators nga Philippine Ecumenical Peace Platform nga gipangolohan ni Bishop Felixberto Calang sa Iglesia Filipina Independiente ug ni Davao City Mayor Rodrigo Duterte.
Nadakpan si Bingil niadtong Setyembre 19, 2015 sa Barangay Mahagsay, San Luis, Agusan del Sur.
Matud usab sa pamahayag sa 4th Infantry Division kung asa sakop si Bingil ilalom sa 26th Infantry Battalion nga ang aktong pagpangsikop sa mga kasondalohan usa ka pamaagi nga aron maundang ang mga kalihukang gahatag og kalamboan sa usa ka komunidad.
Dugang ni Major Jonna Dalaguit, military doctor nga mi eksamen ni Bingil, nga base sa inisyal nga imbestigasyon, nakahiagom si Bingil og “physical and mental fatigue,” ug temporaryo nga magpaayo sulod sa Camp Evangelista Station Hospital sa Cagayan de Oro.