Kanhi priso nakuhaan og shabu

NAGTINGKAGOL sa mini-cell sa Police Station 3 (PS3) sa Agora ang usa ka kanhi piniriso human nakuhaan og duha ka pakete sa gituohang shabu samtang nagpahigayon ang kapolisan og mobile checkpoint ug Oplan Bakal Sita niadtong Martes mga alas 10:00 sa gabii sa J.R Borja Extension, Gusa, siyudad sa Cagayan de Oro.

Ang suspetsado naila nga mao si Rosbel Rotol, 30, minyo ug lumolupyo sa Zone 2, FS Catanico, Cugman ning siyudad.

Si SPO3 Agustine Labininay sa PS3 miingon nga samtang nagpahigayon sila og checkpoint, nakita sa kapolisan ang naglabaw nga puloan sa kutsilyo samtang sakay ang suspetsado sa motorela, hinungdan nga ila kining gisikop.

Narekober usab sa bulsa sa suspetsado ang duha ka mga pakete sa gituohang shabu ug ang maong mahait nga hinagiban nga adunay gitas-on nga 10.5 pulgada.

Nasayran usab nga bag-o pa lang nakagawas ang suspetsado gikan sa city jail sa Lumbia sa kasong frustrated murder human maserbisyohan ang salaod sulod sa lima ka tuig.

Sa pagkakaron, ang maong suspetsado ang kasamtangang nagtingkagol sa mini-cell sa PS3 samtang ang maong mga ebidensiya ang gitakdang pagadalhon sa crime laboratory alang sa eksaminasiyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph