TINGUHA karon nga ipaubos sa mediation ang kaso nga naglambigit nilang suspended Fiscal Mary Castro ug sa mga sakop sa Regional Special Operations Group (RSOG) 7, human usab napaubos na sa arraignment ang piskal sa mga kasong direct assault ug malicious mischief.
Samtang mga sakop sa media nga nag-cover atol sa giingong kaguliyang sa RSOG office niadtong Marso, buot ipatawag ni Castro sa korte.
Ang korte na maoy nihatag ug not guilty plea alang kang Castro ug sa kauban niyang laing upat ka mga lalaki ug duha ka mga babaye sa mga kasong two counts of direct assault ug malicious mischief, atol sa ilang arraignment sa sala ni MTCC 7 Judge Francisco Seville.
Kini subay sa giingong pagsukol nila sa mga sakop sa RSOG niadtong Marso 7 sa gabii, dihang gibadlong si Castro sa giingong pag-eskandalo niini sa ilang opisina.
Si Judge Seville nipatawag sa kampo ni Castro ug sa mga pulis nga girepresentahan ni Atty. Inocencio de la Cerna, sulod sa iyang opisina ug nisugyot sa pag-settle sa isyu aron dili na kinahanglang husayon sa korte ang kaso.
Karong Hunyo 23 gitakda nga magtagbo ang duha ka habig alang sa mediation apan kun mapakyas kini, ang korte na usab ang mopahigayon ug judicial dispute resolution sa tinguha nga mahilot ang kasungian.
Konsultahon pa hinuon ni Atty. De la Cerna ang iyang mga kliyenteng pulis labot niini kay kun dunay mahitabong mediation, angayang dili lang usa lang ka kaso ang i-settle kundi lakip na ang ubang kaso sama sa P11-million damage suit nga gisang-at ni Castro ngadto sa Talisay City RTC.
Samtang, gi-trace na karon ni Castro kun kinsa kadtong mga sakop sa media nga ni-cover atol sa nahitabong kaguliyang sa RSOG office niadtong Marso 7.
Buot niya nga ipatawag sila sa korte aron himuong saksi sa damage suit nga iyang gisang-at, nunot sa giingong pagpaka-uwaw sa mga pulis kaniya. Wa hinuon makakita sa panginahanglan alang niini si Atty. De la Cerna. Ang mga pulis, niduso ug kontra demanda batok ni Castro ug nangayo’g P22 milyones nga danyos.