SUBLING mipahimangno ang City Health Office ngadto sa publiko sa pag-mintinar sa kalimpyo sa palibot aron malikayan ang chikungunya, usa ka sakit nga dala sa lamok.
Ang maong sakit nagdala og hilanat, rashes, sakit-sakit sa lutahan diin ang biktima halos dili na makabarog.
Matod ni Doctor Joey Retuya, epidemiologist sa City Health and Sanitation Clinic, aduna nay 70 kapin ka mga residente gikan sa Barangay Mambuaya ang nataptan sa balatian ug laing siyam gikan sa Barangay Gusa.
Hinoon, gipasalig ni Retuya nga gipakusgan pa ang kampanya sa dakbayan pinaagi sa pagpahimangno sa publiko sa padayong pagsunod sa “4S Habit” batok mosquito-borne diseases.
Ang “4S” naglangkob sa pagpangita sa pinuy-anan sa lamok hinungdan sa pagdaghan niini, self-protective measures pinaagi sa pagbutang og screen sa mga bintana, seek early consultation ug say no to indiscriminate fogging tungod sa dakong epekto sa panglawas.
Samtang gibutyag nga kapin usa ka libo na ang nataptan sa dengue dinhi sa dakbayan sugod niadtong bulan sa Hulyo, apan walay gikatahong namatay.
Apan bisan pa man niini, nanawagan si Kagawad Maria Lourdes Gaane, chair sa komitiba sa panglawas, ngadto sa publiko nga batasanon kanunay ang paghinlo sa palibot aron malikay sa sakit nga chikungunya ug dengue. (CIO)