NAGMANGTAS sa 3rd quarter si DeMarcus Cousins aron agakon ang host Sacramento Kings ngadto sa 116-92 nga kadaugan batok sa Los Angeles Lakers kagahapon sa National Basketball Association (NBA).
Si Cousins nimugna og 31 puntos ug 16 rebounds, kadaghanan niini iyang namugna sa 3rd quarter.
Ang Lakers unang nakapasutoy sa ilang opensa sa sayong bahin ug nakaposte kini’g 17-9 nga bintaha.
Hinayhinay nga ningkamang ang Kings hangtod nga niulbo ang opensa ni Cousins sa 3rd quarter aron pangulohan ang 38-8 run sa 3rd quarter nga nakahatag kanila og 21 puntos nga labaw, 87-66.
Sa pagpangulo ni Fil-Am Jordan Clarkson, ang Lakers mingsuway paggukod ug napahak nila ang labaw sa Kings, 82-94, sa nahabiling kapin sa walo ka mga minutos.
Apan didto ra kutob ang paggukod sa Lakers kay gipauwanan na sab sila og sunodsunod nga puntos sa Kings paingon sa 24 puntos nga kadaugan.
Ang Kings mingsaka sa 9-15 nga baraha samtang ang Lakers, nga nakaangkon sa ikapito nilang sagonson nga pilde, nangahagbong sa 10-17 nga rekord. AP/ESL