KANHI barangay kapitan sa Agus, dakbayan sa Lapu-Lapu nga si Remigio “Bo” Oyao gikatahong gipusil sud sa iyang sakyanan sa Sityo Atabay sa naasoy nga barangay kagabii.
Si Oyao daling gidala sa Mactan Doctor's Hospital, Barangay Basak, Lapu-Lapu.
Sumala sa taho sa Facebook sa dyAB sa ABS-CBN nga nikutlo sa pamahayag ni Lapu-Lapu City Homicide Investigator SPO1 Luisito Ernie, kini gikataho nga si Oyao dead-on-arrival (DOA) naasoy nga ospital sa alas 6:00 sa gabii.
Dugang sa samang taho sa dyAB, si Oyao naigo sa pito ka mga bala sa wala pa matino nga kalibre sa armas sa iyang luyo ug ulo.
Ang homicide investigator nagpadayon pa sa ilang pakisusi sa hinungdan sa krimen o motibo sa pagpamusil.
Ang igsuon ni Bo nga si Washington alyas Inday ang gipusil-patay niadtong Septiyembre 2016 samtang kini nagbantay sa iyang tindahan.
Gikataho nga nalambigit sa illegal drug trade ang Oyao brothers, apan gihimakak kini sa pamilya.
Atol ning pagsuwat, wala pa masayri kon asa ihaya ang lawas sa namatay. (FVQ)