GIPABALIK sa Korte Suprema sa Power Sector Assets and Liabilities Management (Psalm) Corp. ang notice of award nga giluwatan niini ngadto sa Therma Power Visayas Ic. (TPVI).
Ang labing taas nga hukmanan nimando usab nga ipaway bili ug ipadaplin ang Asset Purchase Agreement ug Land Lease Agreement tali sa Psalm ug SPC Power.
Sa desisyon sa Supreme Court pinetsahan og Oktubre 5, 2016, nimando kini sa Psalm nga ipatuman ang APA ug LLA pabor sa TPVI ug sa pagbalik sa notice of award nga giisyu ngadto sa TPVI nga pinetsahan og Abril 30, 2014.
Kini may kalambigitan sa pagbaligya sa 153.1-megawatt nga Naga Power Plant sa Barangay Colon, dakbayan sa Naga, habagatang Sugbo.
Ang planta dunay 52.5-MW Coal Thermal Power Plant (CTPP) 1, 56.8-MW CTTP 2 ug 43.8-MW Cebu Diesel Power Plant.
Ang Aboitiz Power Corp., nanag-iya sa TPVI, nihangop sa mao nga kalamboan tungod kay gibarogan niini nga balido ug niagi sa tukma nga proseso ang bidding sa pagbaligya sa planta.
“Had TPVI not participated, the government would have sold its asset at a much lower price,” matod ni Sebastian Lacson, presidente sa Aboitiz Power Coal Group, sa press statement nga nadawat sa Superbalita Cebu kagahapon.
Ang Korte Suprema nipawalay bili sa pagbaligya sa NPP ngadto sa kasamtangan nga operator, ang SPC Power Corp.
Niadtong Abril ning tuiga, ang Supreme Court niisyu og notisya nga nagbasura sa hangyo sa SPC Power nga tugtan kini nga moapilar sa desisyon sa ikaduhang higayon.
Ang Psalm nipahigayon og unang bidding alang sa pagbaligya sa NPP niadtong 2013.
Apan napakyas ang unang duha ka hugna sa bidding tungod kay bugtong ang SPC lang ang niapil.
Sa ikatulong round, niapil ang TPVI ug maoy midaug uban sa bid nga P1.089 bilyones, mas taas sa bid sa SPC nga P859 milyones.
Apan ang SPC migamit sa “right-to-top” niini ug gitukbangan og P1.14 bilyones alang sa pacilidad.
Niini, ang Psalm niisyu og notice of award ngadto sa SPC bisan og nikwestyon ang SC sa kabalido sa “right-to-top provision.”
Gumikan niini, si kanhi senador Sergio Osmeña III nikwestyon sa kabalido sa “right-to-top” sa SPC ug niduso og petition for certiorari niadtong Hunyo 26, 2014.
Sa naunang desisyon sa Korte Suprema niadtong Septiyembre 28, 2015, kini nipaway bili sa right to top sa SPC.
Isip resulta, ang asset purchase agreement ug land lease agreement tali sa Psalm ug SPC Power sa Naga complex gipaway bili.