COTABATO CITY -- Usa ka field commander sa Bangsamoro Islamic Freedom Fighters (Biff) ang napatay atol sa engkuwentro tali sa militar, alas 4 sa hapon sa Datu Salibo, Maguindanao Province.
Giila ang napatay nga si Esmael Tamarin, alyas Kumander Tamarin, molupyo sa Barangay Butilin, Datu Salibo.
Gikanayon ni 1st Mechanized (light armor) Brigade commander, Colonel Felicisimo Budiongan nga na-engkuwentro sa mga sundalo ang grupo ni Kumander Tamarin nga milungtad og 45 minutos hinungdan sa paghikling sa mga molupyo sa dapit sa kahadlok nga maipit sa kagubot.
Miatras ang mga rebelde sa diha nga gibombahan na sa militar ang ilang gi-puwestuhan gamit ang 81 mm Mortar ug 90 rr Bazooka.
Apil nga napatay ang lain pang tulo ka mga sakop sa BIFF samtang giingong unom sab ang naangol.
Ang mga napatay ug naangol gikompirma mismo ni Bangsamoro Islamic Freedom Movement Spokesman Abu Misry Mama.
Hugtanon nga gihimo karon ang pagbantay sa mga sundalo ug pulis sa Maguindanao sa posibleng panimalos sa BIFF sa kamatayon ni kumander Tamarin. (Edgar E. Fuerzas)