WA ikahasol ni Mayor Tomas Osmeña ang pag-postpone og usa ka semana sa memorandum of agreement (MOA) may labot sa land-swap tali sa Cebu City ug Kapitolyo aron mahatagan og kasegurohan sa pagpuyo ang libuan ka pamilya nga nagpuyo sa 93-1.
Matod ni Osmeña nga kaniadto naghuwat sila og dugay nga panahon dihang bise mayor pa si kanhi Mayor Michael Rama diin maoy iyang gitumbok nga hinungdan kon nganong wa madayon ang kanhi landswap nga iyang gitanyag sa Kapitolyo atol sa panahon ni kanhi Gobernador Gwendolyn Garcia ug konsehal pa kaniadto sa siyudad si Gobernador Hilario Davide III.
Kon di aprobahan sa mayoriya sa konseho nga gidomenar sa iyang kaatbang, iya nang tinud-on ang iyang bahad nga molusad og recall.
“They said one week, well, we waited for so many years because of Mike Rama. Will just give it one more week but if they will not go along with it I will initiate a recall against Vice Mayor Edgardo Labella and all the Team Rama councilors,” bahad ni Osmeña.
Ang amahan sa dakbayan sa Sugbo wa usab mahulga kon tinud-on sa mga kapitan nga sakop sa Team Rama ang ilang bahad nga molusad usab sila og recall election batok ni Osmeña.
Sa regular session niadtong Martes, niduso og usa ka semana nga pag-oktaba si Konsehal Joey Daluz aron masusi sa ad hoc committee ang gikasabutan nga maoy nalatid sa house rules.
Matod ni Daluz nga sa di pa nila aprobahan, ila una nga ikonsulta ngadto sa katawhan sa dakbayan ang MOA nga sudlan ni Osmeña kon makiangayon ba kini sa kinabag-ang Sugbanon sanglit ang propiedad nga ibaylo sa tanang yuta sa 93-1, iya sa katawhan sa siyudad.
Ang Provincial Ordinance 93-1 adunay 51 ka ektarya nga nahimutang sa 11 ka barangay sa siyudad ug gibahinbahin sa 4,364 ka home lots, 1,445 ang ka pamilya ang nakahuman og bayad, 1,118 ang wa pa makatiwas ug 1,731 ang wa nibayad bisan piso ngadto sa Kapitolyo sud sa 23 ka tuig human napasar ang 93-1 nga ordinansa.