LAING pagkaalarma na usab ang nasinatian sa mga katawhan human sa duha ka kadudahang mga bag ang gibilin niadtong Miyerkules, Enero 25, alas 11:42 sa gabii diha sa Capistrano/Gomez Street, dakbayan sa Cagayan de Oro.
Daling girespodenhan sa kapolisan gikan sa Police Station 1 sa Divisoria kauban sa tinugyanan sa Explosive Ordnance Disposal (EOD) ang taho kalabot sa maong insidente.
Gikabutyag nga gisusi sa tinugyanan sa EOD ang maong mga bag ug negatibo kini sa eksplosibong butang.
Nasayran nga niadtong milabay nga adlaw aduna’y bag usab nga gituyo sa pagbilin sa wala mailang suspetsado human kini nasapon sa kuha sa closed-circuit television (CCTV) camera diha sa Daumar Street, Barangay 39 ning dakabyan.
Bisan pa man sa mga nahimong pagkaalarma sa mga gipangbiling mga butang nga katahapan nagpasalamat usab ang tinugyanan sa kapolisan sa pagtubag sa katawhan sa ilang panawagan nga i-taho gayud dayon kon ugaling adunay mga katahapan nga butang o tawo ang mamatikdan.
Nagpasalamat usab sila tungod kay pulos nag-negatibo ang ilang mga narespondehang mga taho kalabot niining maong panghitabo.
Sa pagkakaron, nakatala na sa tinugyanan sa kapolisan ang maong insidente.