UTANG nga P500 maoy gituohan nga hinungdan nga naghikog ug namatay ang 41 anyos nga lalake sa Barangay Dapitan, lungsod sa Cordova sa miaging adlaw.
Nagbitay nga naabtan sa iyang live-in partner si Nickelodeon Igot sud sa ilang gipuy-an ug ang nylon nga higot nga gigamit nga hayhayan maoy gibaat sa liog sa namatay, samtang ang tumoy nga bahin gihigot sa trusses nga kahoy.
Sumala pa ni SP01 Erwin Gedorio, imbestigador sa Cordova Police Station, nga sa iyang pakighinabi sa live-in partner nga si Irene Gentapa nasayran nga nangutang og P500 si Igot ngadto sa iyang igsuon nga maoy gamiton sa paglukat og police clearance alang sa pagpang-apply og trabaho.
Apan way dokumento nga nalukat sa dihang ang kwarta gipusta na hinuon ni Igot ug napildi sa sugal nga mahjong didto ra usab sa ilang silangan.
Nasayran lang ni Gentapa sa dihang ang giutangan nga igsuon nangumusta diha niya kon nakalukat og police clearance si Igot human kini nangutang sa kantidad.
Sa kapungot sa kapuyo gisukmatan niya si Igot nga niresulta sa grabeng lalis ug sa dihang mopaingon na molakaw si Gentapa aron motrabaho isip trabahante sa MEPZ iyang gihinginlan ang iyang pares.
“Bantay lang ka ha og naa pa ka dire inig uli nako,” sugilon ni Gedorio base sa saysay ni Gentapa.
Nagtuo si Gedorio nga nasakitan pag-ayo si Igot sa mga pulong nga gibuhian ni Gentapa batok kaniya.
Sa laing bahin, traysikad drayber ang mikutlo sab iyang kaugalingong kinabuhi gumikan sa iyang gihambin nga sakit.
Kaging na ug nagluhod si Saturnino Cañete, 59, molupyo sa Sityo Lupa, Barangay Catarman, Cordova samtang liog gihiktan og nylon nga higot.
Napalgan ang namatay niadtong gabii sa Marso 17 diha ra usab sa iyang balay.
Kabanay ni Cañete nagtuo nga na-depress kini gumikan sa iyang gibate nga sakit sa tiyan ug dili na sab siya makakita pag-ayo. (FVQ)