Lalaki nga kaslunon namatay na

WALA gyod naagwanta sa usa ka lalaki ug nakabsan gyod kini sa kinabuhi human naligsan og apil dihang iyang kaipon ang unang naligsan sa bus niadtong Sabado sa gabii, Septembre 23, sa Gusa Highway ning dakbayan sa Cagayan de Oro.

Ang biktima nga giilang si Benjie Cornella, 27, kinsa kaslunon unta sa unang namatay nga hinigugma nga si Ylona Jane Saran, 21, nakabsan gyod sa kinabuhi sulod sa Northern Mindanao Medical Center pipila ka oras nga nakigbugno sa kamatayon.

Ang igsuon ni Saran nga maoy nibantay ni Benjie sa ospital gumikan ang lain nilang sakop sa pamilya niatiman sab sa unang namatay nga si Ylona namahayag nga dili na kini makatingog ug nag-ugot kini sa kasakit nga gibati tungod kay gisulti sa doktor nga walay dugo migawas sa lawas niini apan nagpundo sa iyang bukog sa ulo.

Maoy hinungdan nga gasige nalang kini og bombahan apan wala niini naantos.

Dugang sa igsuon ni Saran nga upat sab diay ka bulan nga mabdos si Ylona kinsa maoy unang nabanggaan sa bus ug dihang nakita kini ni Benjie nga napailawom sa bus iya kining gidagan ug mitabok apan siya sab ang naligsan og lakip sa usa ka pick-up.

Giklaro sa igsuon nga wala nag-away ang duha sukwahi sa nanggawas nga mga report ug giingong sweldo ni Benjie niadtong tungora ug gakita kanunay ang duha aron mamalit og ilang kunsumo alang sab sa ilang 2-anyos nga anak. Kaslunon sab unta ang duha human sa pila ka tuig nga pag-puyo.

Gani ang pamilya ni Benjie ning panahona ang anaa pa sa Iloilo ug galisod sab sa paghidangat dinhi sa dakbayan tungod sa kakulang sa pamasahe.

Ang duha gikatakdang usahon og haya sa Bollozos funeral parlor ning panahona.

Detinado na usab ang driver sa Bachelor Express nga bus nga mao si Charlie Kongreso kinsa maoy unang nakaligis ni Ylona ug driver sa pick-up nga mao si Bonifacio Macalam kinsa mao sab nakabangga ni Benjie.

Related Stories

No stories found.
SunStar Publishing Inc.
www.sunstar.com.ph