Lancers vs. SWU Cobras

Mga duwa karon

5:15 pm- CITU batok UC (college)

6:45 pm- UV batok SWU (college)

SEGURADONG luna sa top two ang tinguha sa defending champions University of the Visayas (UV) Green Lancers sa ilang pagpakigsangka sa Southwestern University (SWU) Cobras sa main game karong gabii sa Cebu Schools Athletic Foundation Inc. (CESAFI) basketball college division sa Cebu Coliseum.

Ang makasulod sa top two human sa double-round robin elimination maggunit og twice-to-beat nga bintaha sa nagkaduol nga semi-finals diin magparang ang No.1 squad batok No.4 ug No.2 batok No.3.

Kasamtangan man tuod nga nagpatong sa liderato ang Green Lancers dala ang 8-1 nga rekord apan kon mapilde sa sa katapusan nilang tulo ka mga tahas gikan karon, posible pa silang matagak sa top two.

Ang mga aduna pa’y poruhan nga makagukod sa Green Lancers sa inilugay sa top two mao ang University of San Jose Recoletos (USJR) Jaguars (8-2) ug University of San Carlos (USC) Warriors (6-4).

Kon importante kining duwaa alang sa Green Lancers, mas importante kini alang sa Cobras nga kasamtangang nagbitay sa ikalimang dapit bitbit ang 4=6 nga rekord ug delikadong sayod nga manamilit.

Ang Cobras nagkinahanglang modaog sa katapusan nilang duha ka mga tahas aron magpabiling buhi ang ilang paglaom nga makakumpayot sa katapusang puwesto sa semis.

Kon mapilde ang Cobras ning sangkaa, hayan hingpit nang mahanaw ang ilang paglaom nga makaabante sa sunod round.

Ning sangkaa, daw magkinahanglan og perpektong duwa ang Cobras aron mabuntog ang puwersa sa Green Lancers.

Sa premirong sangka sa duha ka mga kampo niadtong Agusto 27, gipangmakmak sa Green Lancers ang Cobras, 83-73.

Sa laing bahin, ang University of Cebu (UC) Webmasters mosuway pagpahugot sa ilang paggunit sa ikaupat nga luna sa ilang pagpakigsangka sa Cebu Institute of Technology University (CITU) Wildcats.

Ang Webmasters, nga adunay 5-5 nga rekord, posible pang magukdan sa Cobras sa inilugay sa katapusang luna sa semis hinungdan nga gikinahanglang nilang modaog ning sangkaa.

Alang sa Wildcats, konsuwelo ug gamayng garbo na lang ang ilang giapas ning kombatiha gumikan kay tagak na man silang daan dala ang 1-9 nga baraha. (ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph