Landslide sa Manipis; dili maagian

DAKONG landslide nahitabo na usab sa barangay Manipis, dakbayan sa Talisay.

Tungod niini hingpit nga wala maagii sa mga motorista ang maong dapit ilabi na niadtong mga sak­yanan nga mopaingon sa Toledo ug Naga City.

Nagpasalamat ang mga opisyal sa bara­ngay atol sa hitabo nga wala usay mga panimalay ang naigo sa mga dagkong bato.

Si Kapitan Emma Cabiluna sa Barangay Manipis, nga nahinabi sa Sun.Star Superbalita, mibut­yag nga pasado alas 8:00 niadtong Martes sa gabii na­dawat niya ang report nga adunay landslide sa may Sityo Proper Languyon.

Dali niyang gimandoan ang mga tanod ug iyang mga opisyal nga pabantayan ang lugar nga dili maagian nianang gabii.

Nangayo usab siyag tabang ni Konsehal Danny Caballero kinsa mao nay mitawag sa kadagkuan sa Department of Public Works and Highways ug sa QM Builders, ang kontraktor nga nagpalapad sa karsada.

Si Caballero nga dali usab nga miadto sa lugar mii­ngon nga human niya makita ang kadelikado sa dapit wala gyud nila paagi ang karsada sa mga motorista.

Apan gumikan sa kadako sa landslide si Jorge Laroa, Assistant Chief sa maintenance division sa DPWH-7 2nd District, hugot usab nga miawhag nga dili una paagian ang maong dapit kay dako aayo ang po­sibilidad nga subli pa kining modahili.

Sa iyang bahin ang supervisor sa QM Builders nga si Marvin Latorre mipahibawo nga ang ilang gihimo mao lang ang pag-bungkag sa yuta sa ibabaw nga bahin nga posibling modahili na usab.

Kagahapon ang mga tawo nga gusto gyud mota­bok hinungdan nga ang mga opisyal sa barangay Manipis temporaryong mitaud og pisi kilid sa karsada aron adto sa ubos nga bahin kini mangagi.

Nasayran nga dili kini maoy unang higayon nga adunay landslide nga nahitabo sa barangay Manipis.

Katapusang nakasinati og landslide ang maong dapit kadtong adunay namatay nga motorista nga nadakdakan sa dakong bato nga midahili sa sayong bahin ning tuiga.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph