ANG Lapanday Foods Corporation (LFC) nagpahayag nga nalugi sila sa kantidad nga US$120,000 sa gihimo sa mga nagprotesta nga mag-uuma nga nidanyos sa 15 ektaryang plantasyon sa saging sa Barangay Madaum, Tagum City.
Si LFC Legal Counsel Leilani Espejo sa gihimo nga media briefing Biyernes, Disyembre 16, sa Apo View Hotel sa Davao City nagsulti nga sukad niadtong Biyernes, 700 ka mga tawo nga miyembro sa Madaum Agrarian Reform Beneficiaries Association Inc. ug militanteng grupo nagpabilin sa lugar hangtud Huwebes sa gabii, diin nila gipamutol ang 2,000 ka punoan sa saging.
“It is an illegal act, those standing crops are not owned by ARBs (Agrarian Reform Beneficiaries),” suma ni Espejo.
Siya midugang nga ang nagtindog nga pananum ilawom sa pag-amuma sa kompanya mao nga kadtong namutol nakalapas sa kasabutan tali Hijo Employees Agrarian Reform Beneficiaries Cooperative (Hearbco).
Ang kasabutan gipirmahan tali Hearbco ug LFC niadtong Septiyembre 9, 2011, nga naghatag sa LFC sa katungod sa pagdumala sa porsyon sa Hearbco banana plantation.
Mga miyembro sa Marbai, kinsa kanhi sakop sa Hearbco, misupak sa maong kasabutan ug sila gitaktak gikan sa kooperatiba.
Si Espejo nagkanayon nga ang kompanya nangayo og tabang sa kapulisan dihang gipamutol ang saging apan ang mga opisyal nagduha-duha sa paghimo sanglit giingnan sila nga di moadto sa lugar.
Niadtong Disyembre 8, mikabat sa 20 ka armadong tawo, kinsa midisarma sa ilang mga guwardiya dayon pinugos nga misud sa Hearbco compound ug packing house, gisikop sa kapulisan sa Tagum.
Si Espejo nilimod nga barato kaayo ang palit sa kompanya sa saging, butang nga gisupak sa Marbai Cooperative.
Giingon nga ang kompanya naghatag og 40 porsyento nga gross nga kita sa mag-uuma, ug sila nalipay ug nakauyon niini.
Gilimod usab ang pasangil nga duna silay gibutang nga mga guwardiya sa 150 ektaryang luna.
Ang kompanya nagsulti nga di tinuod nga ilang mga guwardiya ang namusil sa 13 ka mga mag-uuma.
Giangkon ni Espejo nga naglisud sila sa pagsulbad sa nahisgutang suliran.
Si Tagum City Mayor Allan Rellon nag-organisa usab og dayalogo tali Lapanday ug Marbai niadtong Disyembre 14 apan way representante sa Marbai ang mitungha.
Laing diskusyon ang gitakda karong Disyembre 19.
Ang Marbai gilangkuban sa 1/3 sa Hearbco, ang kooperatiba nga aktibong katambayayon sa Lapanday.
Si LFC Finance Officer Lito Dagatan nagsulti nga ang Marbai moresolba sa isyu tali Hearbco ug irekognisa ang kontrata nga ilang gipirmahan tali kompanya.
Siya nidugang naglaum sila nga ang Department of Agrarian Reform motabang sa paghiusa sa grupo.
Ang Marbai midaug sa kaso batok Hearbco sa ilang reinstatement sa kooperatiba sa Provincial Agrarian Reform Adjudicator niadtong Disyembre 15, 2015.
Sa laing pahayag gikan sa Marbai ug Unyon sa mga Mag-uumang Nagtikad para sa Tinuod na Repormang Agraryo nga gipadala sa SunStar Davao Biyernes, nagsulti nga niadtong Disyembre 9, ang ARBs ug ilang pamilya uban sa suporta sa mga asosasyon sa pesante, pinal nga nakaangkon 145 ektarya nga giangkon sa LFC.
Ang grupo nag-alegar nga ang LFC ug ilang guwardiya lakip na mga armadong tawo namusil sa mga pesante, trabahante sa sagingan.
Ilang giawhag si Pangulong Rodrigo Duterte nga atimanon ang problema sa mga benepisyaryo.