DALI kaayong naka-react ang mga kritiko ni Pamuno Rodrigo Roa Duterte nga kini ma-impeach kon tinuod makig-joint venture ang nasod sa China sa oil exploration sa Spratley islands.
Pun-an pa nga ang China ilhon dinhi nga tag-iya sa dapit sama sa Pilipinas samot nga si Digong klarong makasupak gyud sa atong batakang balaod nga maoy ground sa impeachment.
Husto ang mga kritiko kay klaro man gud sa batakang balaod (Art. 2) nga sa atong relasyon sa ubang kanasuran ipatigbabaw ang atong nasudnong soberanya (national sovereignty, kaligdong sa teritoryo (territorial integrity) ug nasudnong interes.
Gipalig-on ang atong soberanya sa Spratley islands dihang midaog ta sa Prague International Court diin ginulo ug gibaliwa ang pangangkon sa China. sa mga isla.
Kini gong atong pakighigala sa China gituyo sa atong kagamhanan aron di mokayo sa kainit ang atong panaglalis sa China ning isyu sa pagpanag-iya sa Spratley.
Lisod kon mosangkog gubat. Sayod ta sa kahaguka sa atong armadong kusog tandi sa China. Sa karaang panultihon: sayon ra tang tilaan sa China ug pakapinan pag paak ug wisi-wisi.
Okey ning joint oil exploration apan di gyud isibog ang atong soberanya pinaagi sa pag-ila sa China nga tag-iya kay katumbas ni sa paghatag sa atong teritoryo ngadto niini.
Apan si Digong usa ka abogado ug nahibawo kaayo sa batakang balaod nga iyang gipanumpaan sa pagpanalipod. Kining lindog nagtuo nga di gyud ni mahitabo kay ang international agreement nagkinahanglan mag 2/3 votes sa senado (Art.7)
Aduna nay mga military installations sa mga man-made island sa Spratley timailhan nga aduna gyuy hidden agenda ang China Ingon sa wa na man tay mahimo niini maghuwat na lang ta sa aksyon sa mga superpowers nga wa makauyon sa gibuhat sa China.
Gitan-aw man gud dinhi ang kagawasan sa paglawig (freedom of navigation) ug ang biniyon nga dolyar nga negusyo nga mag-agian ning dapita ngadto sa Southeast Asia.