Lariosa: Kamatayon sa maayong tawo

NAHIDUOL ko sa iyang pagkatawo dihang kauban ming kandidato pagka konsehal sa lungsod ubos sa pundok ni Mayor Abe Canoy. Si Alexander Alicaway diha sa iyang late 30’s.

Batan-on ug hupong sa kadasig sa pagpapili pag-usab isip konsehal. Nidaog siya nga independente. Kay belib sa programa , nitapon siya uban sa iyang amahan kang Abe.

Kuyog-mi sud sa usa ka buwan sa kampanya sa 2007 elections. Nitug-an siya nako nga nidaog siyang independente tungod sa iyang amahan nga nitabang niya. Si Lidoy Alicaway nga tulo ka termino nga way pildi-pildi isip konsehal.

Si Lidoy giila sa kadaghanan nga ‘political genius’ nag barangay kapitan sa Tinubdan ug pamuno sa Association of Barangay Council (ABC) sa lungsod ug konsehal (de officio).

Dihay higayon nga nitug-an siya nako sa iyang stage fright, apan ako siyang gidasig. Kanunayng mamugnawng iyang kamot sa entablado, apan tungod sa akong kanunayng pag-abiba nabuntog niya ang stage fright.

Nidaog siya. Ako pildi kay tingali di maayong pulitiko sa piniliay nga kwartahay. Gidasig ko niya pagdagan pag-usab kay abli si Abe kanako. Apan sa pagdagan sa katuigan nakalimot na ko sa pulitika.

Maayong tawo si Alexander. Magtinagdanay gihapon mi. Di sama nianang ubang  pulitiko nga inigdaog tikig na kaayog liog. Di na molingi. Kanunay siyang mangumosta nako kon magkakita sa akong mga anak.

Dihang gipatay siya sa riding-in-tandem, nahitiurok kog dugay. Gipatay ang akong higala nga maayong tawo? Daghan ang tabi-tabi ug duda-duda nga ang mga killer hitmen ug ang mastermind naa ra sa lungsod.

Apan nalipay ko nga mitanyag si Mayor Nenet Reluya nga mohatag og P200,000.00  sa makatug-an sa mga killer apil ang mastermind. Nindot kini nga kalambuan aron daling makawot ang tinuod.

Hinaot nga tinud-on ni sa kapulisan kon mahimo patabang sila sa NBI. Tingalig mapareho ni sa killer ni Ronda Vice Mayor Jonah John Ungab nga ingnon lang nga wan-a kay. gipatay. Amen. Amen.

Related Stories

No stories found.
SunStar Publishing Inc.
www.sunstar.com.ph