WHISTLEBLOWER nga daw katuohan. Sakop sa Davao Death Squad (DDS) kuno si Roger Matobato. Tawo ni Senador Leila Delima nga mitestigo sa sa miaging semana sa Senate Hearing on extrajudicial killings.
Detalyado tuod ang gisaysay, apan daghan ang nagkasungi (inconsistencies). Pananglitan, niingon siya nga tawo siya ni Digong ug ni Bato. Apan si PNP Chief Ronald “Bato” de la Rosa niingon nga mao pay pagkakita niya kang Matobato.
Nakigtagbo kuno siya sa PAOCTF niadtong 2001 sa (Presidential Anti-Organized Crime Task Force) niadtong tungora ubos ni Bato sa usa ka sabot-sabot pagpatay og usa ka terorista sa Davao City.
Giwiktan siya ni Senador Panfilo Lacson kanhi hepe sa PAOCTF nga di mao ang tuig nga giingon niya kay sa 2001 gi-abolished na ang maong task force. Si Bato wa sad mahinumdom sa maong sabot-sabot.
Niingon pa nga si Davao City Vice Mayor Paolo Duterte (anak ni Digong) usa ka drug addict. Apan dihang gipangutana kini ni Senador Allan Peter Cayetano kon nakakita ba siya niini nga nagsuyop og shabu nitubag nga wa siya makakita.
Unya, gipapatay pa kuno ni Digong ang mga security guard ni kanhi House Speaker Prospero Nograles. Sa usa ka press release ni Nograles siya nipatin-aw nga wa siyay mga guard nga gipamatay.
Nitug-an pa si Matobato nga si Paulo Duterte maoy nagpapatay kang Hotelier Richard King tungod sa babaye. Ang mastermind pagpatay kang King napriso na. Ang giingong babaye tiguwang, Kataw-anan kon may interes si Paulo.
Hinuon, gisiksik pa ang katinuod sa mga gipanulti ni Matobato, Apan si Senador Cayetano niingon nga ang self-confessed killer nagsaysay og 100 % mga bakak ug kini plan B sa Liberal Party pag-ilog sa gahom sa Malakanyang.
Gub-on ang dungog ni Presidente Durterte aron siya iwakli sa mga tawo ug si Vice President Lenie Robredo na ang molingkod sa Malakanyang. Kini may posibilidad, apan matod ni Lacson wa kini basihanan.
Problema ron ni Matobato ang seguridad. Ang hangyo ni Delima nga hatagag siyag Senate protection wa tagda ni Senate President Pimentel. Angayng dakpon kini siya iniggawas sa senado kay usa ka murderer.
Apan ning mga gutloa nagkurog na si Delima sa House inquiry. Tiamoy mitestigo batok niya si Herbert Colangco, drug lord sa BNP, nga siya diay magdawatag P3 M matag buwan isip payola. Patay!